ai mere soch-nagar ki rani

tujh se jo maiñ ne pyaar kiyā hai tere liye? nahīñ apne liye

vaqt kī be-unvān kahānī kab tak be-unvān rahe

ai mire soch-nagar kī raanī ai mire ḳhuld-e-ḳhayāl kī huur

itne dinoñ jo maiñ ghultā rahā huuñ tere binā yūñhī duur hī duur

soch to kyā phal mujh ko milā maiñ man se gayā phir tan se gayā

shahr-e-vatan meñ ajnabī Thahrā āḳhir shahr-e-vatan se gayā

ruuh kī pyaas bujhānī thī par yahāñ hoñToñ kī pyaas bhī bujh na sakī

bachte sambhalte bhī ek sulagtā rog banī mire jī kī lagī

duur kī baat na soch abhī mire haat meñ tū zarā haat to de

tujh se jo maiñ ne pyaar kiyā hai tere liye? nahīñ apne liye

baaġh meñ hai ik bele kā taḳhta bhīnī hai is bele kī sugandh

ai kaliyo kyuuñ itne dinoñ tum rakkhe rahīñ ise god meñ band

kitne hī ham se ruup ke rasiyā aa.e yahāñ aur chal bhī diye

tum ho ki itne husn ke hote ek na dāman thaam sake

sehn-e-chaman par bhauñroñ ke bādal ek hī pal ko chhā.eñge

phir na vo jā kar lauT sakeñge phir na vo jā kar ā.eñge

ai mire soch-nagar kī raanī vaqt kī bāteñ rañg aur bū

har koī saath kisī kā DhūñDe gul hoñ ki bele maiñ huuñ ki tū

jo kuchh kahnā hai abhī kah le jo kuchh sunñā hai sun le

tujh se jo maiñ ne pyaar kiyā hai tere liye? nahīñ apne liye

dil kī na pūchho kyā kuchh chāhe dil kā to phailā hai dāman

giit se gaal ġhazal sī āñkheñ sā.ad-e-sīmīñ barg-e-dahan

juuḌe ke inhīñ phūloñ ko dekho kal kī sī in meñ baas kahāñ

ek ik taarā kar ke Duubī māthe kī tannāz afshāñ

sahne kā dukh sah na sake ham kahne kī bāteñ kah na sake

paas tire kabhī aa na sake ham duur bhī tujh se rah na sake

kis se kahe ab ruuh kī biptā kis ko sunā.e man kī baat

duur kī raah bhaTaktā raahī jīvan-rāt ghanerī raat

hoñToñ kī pyaas bujhānī hai ab tire jī ko ye baat lage na lage

tujh se jo maiñ ne pyaar kiyā hai tere liye? nahīñ apne liye

tujh se jo main ne pyar kiya hai tere liye? nahin apne liye

waqt ki be-unwan kahani kab tak be-unwan rahe

ai mere soch-nagar ki rani ai mere KHuld-e-KHayal ki hur

itne dinon jo main ghulta raha hun tere bina yunhi dur hi dur

soch to kya phal mujh ko mila main man se gaya phir tan se gaya

shahr-e-watan mein ajnabi Thahra aaKHir shahr-e-watan se gaya

ruh ki pyas bujhani thi par yahan honTon ki pyas bhi bujh na saki

bachte sambhalte bhi ek sulagta rog bani mere ji ki lagi

dur ki baat na soch abhi mere hat mein tu zara hat to de

tujh se jo main ne pyar kiya hai tere liye? nahin apne liye

bagh mein hai ek bele ka taKHta bhini hai is bele ki sugandh

ai kaliyo kyun itne dinon tum rakkhe rahin ise god mein band

kitne hi hum se rup ke rasiya aae yahan aur chal bhi diye

tum ho ki itne husn ke hote ek na daman tham sake

sehn-e-chaman par bhaunron ke baadal ek hi pal ko chhaenge

phir na wo ja kar lauT sakenge phir na wo ja kar aaenge

ai mere soch-nagar ki rani waqt ki baaten rang aur bu

har koi sath kisi ka DhunDe gul hon ki bele main hun ki tu

jo kuchh kahna hai abhi kah le jo kuchh sunna hai sun le

tujh se jo main ne pyar kiya hai tere liye? nahin apne liye

dil ki na puchho kya kuchh chahe dil ka to phaila hai daman

git se gal ghazal si aankhen saad-e-simin barg-e-dahan

juDe ke inhin phulon ko dekho kal ki si in mein bas kahan

ek ek tara kar ke Dubi mathe ki tannaz afshan

sahne ka dukh sah na sake hum kahne ki baaten kah na sake

pas tere kabhi aa na sake hum dur bhi tujh se rah na sake

kis se kahe ab ruh ki bipta kis ko sunae man ki baat

dur ki rah bhaTakta rahi jiwan-raat ghaneri raat

honTon ki pyas bujhani hai ab tere ji ko ye baat lage na lage

tujh se jo main ne pyar kiya hai tere liye? nahin apne liye