ibn-e-maryam

tum ḳhudā ho

ḳhudā ke beTe ho

yā faqat amn ke payambar ho

yā kisī kā hasīñ taḳhayyul ho

jo bhī ho mujh ko achchhe lagte ho

mujh ko sachche lagte ho

us sitāre meñ jis meñ sadiyoñ ke

jhuuT aur kizb kā añdherā hai

us sitāre meñ jis ko har ruḳh se

reñgtī sarhadoñ ne gherā hai

us sitāre meñ jis kī ābādī

amn botī hai jañg kāTtī hai

raat piitī hai nuur mukhḌoñ kā

sub.h sīnoñ kā ḳhuun chāTtī hai

tum na hote to jaane kyā hotā

tum na hote to us sitāre meñ

devtā rākshash ġhulām imaam

pārsā riñd rāhbar rahzan

barhaman shaiḳh pādrī, bhikshū

sabhī hote magar hamāre liye

kaun chaḌhtā ḳhushī se suulī par

jhoñpaḌoñ meñ ghirā ye vīrāna

machhliyāñ din meñ sūkhtī haiñ jahāñ

billiyāñ duur baiThī rahtī haiñ

aur ḳhārish-zada se kuchh kutte

leTe rahte haiñ be-niyāzāna

dum maroḌe ki koī sar kuchle

kāTnā kyā vo bhūñkte bhī nahīñ

aur jab vo dahaktā añgāra

chhan se sāgar meñ Duub jaatā hai

tīrgī oḌh letī hai duniyā

kashtiyāñ kuchh kināre aatī haiñ

bhañg gāñgā, charas sharāb, afyūn

jo bhī laa.eñ jahāñ se bhī laa.eñ

dauḌte haiñ idhar se kuchh saa.e

aur sab kuchh utaar laate haiñ

gaaḌī jaatī hai adl kī mīzān

jis kā hissa usī ko miltā hai

yahāñ ḳhatra nahīñ ḳhayānat kā

tum yahāñ kyuuñ khaḌe ho muddat se

ye tumhārī thakī thakī bheḌeñ

raat jin ko zamīñ ke siine par

sub.h hote uñDel detī hai

manDiyoñ, daftaroñ miloñ kī taraf

haañk detī dhakel detī hai

rāste meñ ye ruk nahīñ saktīñ

toḌ ke ghuTne jhuk nahīñ saktīñ

un se tum kyā tavaqqo.a rakhte ho

bheḌiyā un ke saath chaltā hai

takte rahte ho us saḌak kī taraf

dafn jin meñ ka.ī kahāniyāñ haiñ

dafn jin meñ ka.ī javāniyāñ haiñ

jis pe ik saath bhāgī phirtī haiñ

ḳhālī jebeñ bhī aur tijoriyāñ bhī

jaane kis kā hai intizār tumheñ

mujh ko dekho ki maiñ vahī to huuñ

jis ko kūḌoñ kī chhāñv meñ duniyā

bechtī bhī ḳharīdtī bhī thī

mujh ko dekho ki maiñ vahī to huuñ

jis ko khetoñ se aise bāñdhā thā

jaise maiñ un kā ek hissa thā

khet bikte to maiñ bhī biktā thā

mujh ko dekho ki maiñ vahī to huuñ

kuchh mashīneñ banā.īñ jab maiñ ne

un mashīnoñ ke mālikoñ ne mujhe

be-jhijak un meñ aise jhoñk diyā

jaise maiñ kuchh nahīñ huuñ īñdhan huuñ

mujh ko dekho ki maiñ thakā-hārā

phir rahā huuñ jugoñ se āvāra

tum yahāñ se haTo to aaj kī raat

so rahūñ maiñ isī chabūtre par

tum yahāñ se haTo ḳhudā ke liye

jaao vo vietnam ke jañgal

us ke maslūb shahr zaḳhmī gaañv

jin ko injīl paḌhne vāloñ ne

rauñd Daalā hai phūñk Daalā hai

jaane kab se pukārte haiñ tumheñ

jaao ik baar phir hamāre liye

tum ko chaḌhnā paḌegā suulī par

tum KHuda ho

KHuda ke beTe ho

ya faqat amn ke payambar ho

ya kisi ka hasin taKHayyul ho

jo bhi ho mujh ko achchhe lagte ho

mujh ko sachche lagte ho

us sitare mein jis mein sadiyon ke

jhuT aur kizb ka andhera hai

us sitare mein jis ko har ruKH se

rengti sarhadon ne ghera hai

us sitare mein jis ki aabaadi

amn boti hai jang kaTti hai

raat piti hai nur mukhDon ka

subh sinon ka KHun chaTti hai

tum na hote to jaane kya hota

tum na hote to us sitare mein

dewta rakshash ghulam imam

parsa rind rahbar rahzan

barhaman shaiKH padri, bhikshu

sabhi hote magar hamare liye

kaun chaDhta KHushi se suli par

jhonpaDon mein ghira ye virana

machhliyan din mein sukhti hain jahan

billiyan dur baiThi rahti hain

aur KHarish-zada se kuchh kutte

leTe rahte hain be-niyazana

dum maroDe ki koi sar kuchle

kaTna kya wo bhunkte bhi nahin

aur jab wo dahakta angara

chhan se sagar mein Dub jata hai

tirgi oDh leti hai duniya

kashtiyan kuchh kinare aati hain

bhang ganga, charas sharab, afyun

jo bhi laen jahan se bhi laen

dauDte hain idhar se kuchh sae

aur sab kuchh utar late hain

gaDi jati hai adl ki mizan

jis ka hissa usi ko milta hai

yahan KHatra nahin KHayanat ka

tum yahan kyun khaDe ho muddat se

ye tumhaari thaki thaki bheDen

raat jin ko zamin ke sine par

subh hote unDel deti hai

manDiyon, daftaron milon ki taraf

hank deti dhakel deti hai

raste mein ye ruk nahin saktin

toD ke ghuTne jhuk nahin saktin

un se tum kya tawaqqoa rakhte ho

bheDiya un ke sath chalta hai

takte rahte ho us saDak ki taraf

dafn jin mein kai kahaniyan hain

dafn jin mein kai jawaniyan hain

jis pe ek sath bhagi phirti hain

KHali jeben bhi aur tijoriyan bhi

jaane kis ka hai intizar tumhein

mujh ko dekho ki main wahi to hun

jis ko kuDon ki chhanw mein duniya

bechti bhi KHaridti bhi thi

mujh ko dekho ki main wahi to hun

jis ko kheton se aise bandha tha

jaise main un ka ek hissa tha

khet bikte to main bhi bikta tha

mujh ko dekho ki main wahi to hun

kuchh mashinen banain jab main ne

un mashinon ke malikon ne mujhe

be-jhijak un mein aise jhonk diya

jaise main kuchh nahin hun indhan hun

mujh ko dekho ki main thaka-haara

phir raha hun jugon se aawara

tum yahan se haTo to aaj ki raat

so rahun main isi chabutre par

tum yahan se haTo KHuda ke liye

jao wo wietnam ke jangal

us ke maslub shahr zaKHmi ganw

jin ko injil paDhne walon ne

raund Dala hai phunk Dala hai

jaane kab se pukarte hain tumhein

jao ek bar phir hamare liye

tum ko chaDhna paDega suli par