ibn-e-qabil ki dua

ai arz-o-samā ke ḳhāliq

be-aib-o-dānā rahīm-o-mālik

na jaane kitnī hai maḳhlūq terī

hisāb kaise tū rakhtā hogā

kahīñ pe insāñ kahīñ pe shaitāñ

farishte jin aur tuyūr-o-haivāñ

bahr-o-bar meñ zamīñ ke bhītar

sañg-o-chob aur fazā ke andar

haiñ aur bhī to karoḌoñ zī-rūh

haiñ sab ke sab jo mutī.a-o-qā.el

magar vo aalam fahīm jis ko

ki to ne ahsan-tarīñ banāyā

ashraf-ul-ḳhalq zakī banāyā

vahī jo ham haiñ ki ya.anī insāñ

hai da.avā jis ko payambarī kā

malā.ik-o-jin pe bartarī kā

hai jis kī ḳhidmat meñ chāñd-sūraj

huā samundar pahāḌ bādal

zamīñ kā madfan fazā kī vus.at

na jaane phir kyā huā ye ham ko

razīl bante chale ga.e ham

bachchoñ būḌhoñ pe qahr Dhā kar

ḳhabīs bante chale ga.e ham

ḳhud apnī beTī bahan ko apne

havas kā luqma banā rahe haiñ

apnī maañ ko bahū ko apnī

ashkoñ meñ ham Dubo rahe haiñ

amn kī jag.hoñ ko rauñd Daalā

tumheñ bhī hissoñ meñ baañT Daalā

ḳhudāyā koī ḳhatā huī hai

yā shāyad ham se yā shāyad tujh se

hisāb meñ tere kamī hai shāyad

yā merī fitrat badal ga.ī hai

ai ḳhāliq-e-kā.enāt-o-bartar

bas ek fariyād aur sun le

hisāb apnā tū Thiik kar le

yā phir se fitrat badal de merī

ai arz-o-sama ke KHaliq

be-aib-o-dana rahim-o-malik

na jaane kitni hai maKHluq teri

hisab kaise tu rakhta hoga

kahin pe insan kahin pe shaitan

farishte jin aur tuyur-o-haiwan

bahr-o-bar mein zamin ke bhitar

sang-o-chob aur faza ke andar

hain aur bhi to karoDon zi-ruh

hain sab ke sab jo mutia-o-qael

magar wo aalam fahim jis ko

ki to ne ahsan-tarin banaya

ashraf-ul-KHalq zaki banaya

wahi jo hum hain ki yani insan

hai dawa jis ko payambari ka

malaik-o-jin pe bartari ka

hai jis ki KHidmat mein chand-suraj

hua samundar pahaD baadal

zamin ka madfan faza ki wusat

na jaane phir kya hua ye hum ko

razil bante chale gae hum

bachchon buDhon pe qahr Dha kar

KHabis bante chale gae hum

KHud apni beTi bahan ko apne

hawas ka luqma bana rahe hain

apni man ko bahu ko apni

ashkon mein hum Dubo rahe hain

amn ki jaghon ko raund Dala

tumhein bhi hisson mein banT Dala

KHudaya koi KHata hui hai

ya shayad hum se ya shayad tujh se

hisab mein tere kami hai shayad

ya meri fitrat badal gai hai

ai KHaliq-e-kaenat-o-bartar

bas ek fariyaad aur sun le

hisab apna tu Thik kar le

ya phir se fitrat badal de meri