if you call i will come

maiñ pahuñch jā.ūñ agar aap mujhe yaad kareñ

merī raftār-e-taḳhayyul kī bhī raftār se tez

qalb-e-muztar se pukārī huī āvāz se tez

aap kī nazroñ ke tīr-e-asar-andāz se tez

maiñ pahuñch jā.ūñ agar aap mujhe yaad kareñ

tez-tar āhū-e-sahrā se ho raftār merī

tez parvāz meñ shāhīñ se bhī raftār merī

garche rāheñ ho bahut mushkil-o-dushvār merī

maiñ pahuñch jā.ūñ agar aap mujhe yaad kareñ

tapish-e-shauq se sho.aloñ kī lapak se baḌh kar

barq-e-betāb kī mānind bā-qalb-e-muztar

jaise mas.hūr koī bar-fusūn-e-sho.abada-gar

maiñ pahuñch jā.ūñ agar aap mujhe yaad kareñ

laakh tārīkiyāñ haa.il hoñ sar-e-rāhguzar

har-qadam par zamāna ke havādis se ḳhatar

maut ke ba.ad bhī har qaid se āzād ho kar

maiñ pahuñch jā.ūñ agar aap mujhe yaad kareñ

main pahunch jaun agar aap mujhe yaad karen

meri raftar-e-taKHayyul ki bhi raftar se tez

qalb-e-muztar se pukari hui aawaz se tez

aap ki nazron ke tir-e-asar-andaz se tez

main pahunch jaun agar aap mujhe yaad karen

tez-tar aahu-e-sahra se ho raftar meri

tez parwaz mein shahin se bhi raftar meri

garche rahen ho bahut mushkil-o-dushwar meri

main pahunch jaun agar aap mujhe yaad karen

tapish-e-shauq se shoalon ki lapak se baDh kar

barq-e-betab ki manind ba-qalb-e-muztar

jaise mashur koi bar-fusun-e-shoabada-gar

main pahunch jaun agar aap mujhe yaad karen

lakh tarikiyan hail hon sar-e-rahguzar

har-qadam par zamana ke hawadis se KHatar

maut ke baad bhi har qaid se aazad ho kar

main pahunch jaun agar aap mujhe yaad karen