id ka mela

lo iid aa.ī lo do puliye maidān meñ bhar bāzār lagā

har chāhat kā sāmān huā har ne.amat kā ambār lagā

sab ujlā shahr umañD aayā shalvār sajā dastār lagā

is bhiiḌ ke biphre tūfāñ meñ jo Duub gayā so paar lagā

Tolī ke aage Tolā hai railī ke pīchhe relā hai

yaaro ye iid kā mela hai

markaz rañgīñ ra.anā.ī kā chiknā tambū halvā.ī kā

ziina ziina zīnat se dharā hai thaal pe thaal miThā.ī kā

gardan ūñchī ras-gulle kī sar nīchā hai bālā.ī kā

halvā.ī daam baTorne meñ sar muuñD rahā hai naa.ī kā

barfī imirtī peḌā hai cham cham laDDū gajrela hai

yaaro ye iid kā mela hai

dhuñdle tarpālī mañDve meñ nāTak nauTañkī aa.ī hai

naubat naqqārā sārañgī Dholak jhāñjan shahnā.ī hai

kal sola teddy paisoñ meñ kis dhuum kī raas rachā.ī hai

lailā ke laboñ par surḳhī hai majnūñ ke gale meñ tie hai

ye hañsne meñ man mojan hai vo gaane meñ albelā hai

yaaro ye iid kā mela hai

ik circus TeḌhā-meḌhā sā anjām to kyā āġhāz nahīñ

us rīchh ke muñh meñ daañt nahīñ is baaz kī āñkheñ baaz nahīñ

vo sher ki jis kī mūñchh to hai par jast nahīñ āvāz nahīñ

totā bhī ḳhair se gūñgā hai shāhīñ ko par-e-parvāz nahīñ

do bandar Tiin ke andar haiñ Darbe meñ murġh akelā hai

yaaro ye iid kā mela hai

pagDanDī jagmag manDī hai bāñsoñ par tambū taane haiñ

kuchh na.e navele hotel haiñ kuchh restaurant purāne haiñ

har Dhañg ke saste khāne haiñ har rañg ke filmī gaane haiñ

kuchh chalte phirte chhoTe chhoTe gashtī ne.amat-ḳhāne haiñ

tar halva garm kaḌāhī meñ do loTe haiñ ik Thela hai

yaaro ye iid kā mela hai

kyā kūcha-o-dar kyā koh-o-daman gul-barg haiñ sab gulnār haiñ sab

ḳhushbū meñ base gulzār haiñ sab rañgoñ se bhare bāzār haiñ sab

bachche to alhaḌ bachche haiñ būḌhe bhī sabā raftār haiñ sab

poshāk meñ chūḌī-dār haiñ aur aur ḳhurāk meñ murġhā-mār haiñ sab

har sū ḳhushiyoñ kā relā hai man mañglā dil tarbelā hai

yaaro ye iid kā mela hai

lo ik jī-dār bisātī ne har chiiz lagā dī chaar aane

kañghī jāpānī chaar aane shīsha baġhdādī chaar aane

patlī sī chhatrī ke nīche momī shahzādī chaar aane

har guḌiyā puḌiyā baajā khājā resham khādī chaar aane

bagule kī choñch meñ machhlī hai kele ke saath karailā hai

yaaro ye iid kā mela hai

bachche baale gabrū būḌhe ḳhush-vaqt hue ḳhush-hāl hue

jhūloñ meñ jhuul ke phuul bane fōtbāl bane bhauñchāl hue

barqī chakkar meñ chakrā kar chahke to ḳhushī se laal hue

ik dhuum dhaḌakkī phere meñ sab paise isti.māl hue

sundarī ke kaan meñ muñdrī hai shauhar kī jeb meñ dhelā hai

yaaro ye iid kā mela hai

lo id aai lo do puliye maidan mein bhar bazar laga

har chahat ka saman hua har neamat ka ambar laga

sab ujla shahr umanD aaya shalwar saja dastar laga

is bhiD ke biphre tufan mein jo Dub gaya so par laga

Toli ke aage Tola hai raili ke pichhe rela hai

yaro ye id ka mela hai

markaz rangin ranai ka chikna tambu halwai ka

zina zina zinat se dhara hai thaal pe thaal miThai ka

gardan unchi ras-gulle ki sar nicha hai baalai ka

halwai dam baTorne mein sar munD raha hai nai ka

barfi imirti peDa hai cham cham laDDu gajrela hai

yaro ye id ka mela hai

dhundle tarpali manDwe mein naTak nauTanki aai hai

naubat naqqara sarangi Dholak jhanjan shahnai hai

kal sola teddy paison mein kis dhum ki ras rachai hai

laila ke labon par surKHi hai majnun ke gale mein tie hai

ye hansne mein man mojan hai wo gane mein albela hai

yaro ye id ka mela hai

ek circus TeDha-meDha sa anjam to kya aaghaz nahin

us richh ke munh mein dant nahin is baz ki aankhen baz nahin

wo sher ki jis ki munchh to hai par jast nahin aawaz nahin

tota bhi KHair se gunga hai shahin ko par-e-parwaz nahin

do bandar Tin ke andar hain Darbe mein murgh akela hai

yaro ye id ka mela hai

pagDanDi jagmag manDi hai banson par tambu tane hain

kuchh nae nawele hotel hain kuchh restaurant purane hain

har Dhang ke saste khane hain har rang ke filmi gane hain

kuchh chalte phirte chhoTe chhoTe gashti neamat-KHane hain

tar halwa garm kaDahi mein do loTe hain ek Thela hai

yaro ye id ka mela hai

kya kucha-o-dar kya koh-o-daman gul-barg hain sab gulnar hain sab

KHushbu mein base gulzar hain sab rangon se bhare bazar hain sab

bachche to alhaD bachche hain buDhe bhi saba raftar hain sab

poshak mein chuDi-dar hain aur aur KHurak mein murgha-mar hain sab

har su KHushiyon ka rela hai man mangla dil tarbela hai

yaro ye id ka mela hai

lo ek ji-dar bisati ne har chiz laga di chaar aane

kanghi japani chaar aane shisha baghdadi chaar aane

patli si chhatri ke niche momi shahzadi chaar aane

har guDiya puDiya baja khaja resham khadi chaar aane

bagule ki chonch mein machhli hai kele ke sath karaila hai

yaro ye id ka mela hai

bachche baale gabru buDhe KHush-waqt hue KHush-haal hue

jhulon mein jhul ke phul bane footbaal bane bhaunchaal hue

barqi chakkar mein chakra kar chahke to KHushi se lal hue

ek dhum dhaDakki phere mein sab paise istimal hue

sundari ke kan mein mundri hai shauhar ki jeb mein dhela hai

yaro ye id ka mela hai