id ke din

riyāz-e-shauq meñ aa.ī bahār iid ke din

nazar-faroz huā rū-e-yār iid ke din

adā adā meñ ināyat nazar nazar meñ karam

mirī ḳhizāñ bhī hai ab tak bahār iid ke din

haiñ un ke jalvoñ kī arzāniyāñ payām-e-nashāt

nahīñ hai dil meñ ġham-e-rozgār iid ke din

dil-e-fasurda meñ phir ḳhūn-e-sarḳhushī dauḌā

vo aa ke mujh se hue ham-kanār iid ke din

nigāh-e-shauq pe parvāna-vār girtī haiñ

tajalliyāñ bhī haiñ be-iḳhtiyār iid ke din

na un kī āñkhoñ meñ ġhussa na kuchh jabīñ pe shikan

baras rahā hai nigāhoñ se pyaar iid ke din

nigāh-e-mehr kī garmī hai raushnī dil kī

hai bazm-e-shauq mirī kāmgār iid ke din

vo fart-e-shauq meñ hañs hañs ke mil rahe haiñ gale

hai shaad 'jauhar'-e-sīna-figār iid ke din

riyaz-e-shauq mein aai bahaar id ke din

nazar-faroz hua ru-e-yar id ke din

ada ada mein inayat nazar nazar mein karam

meri KHizan bhi hai ab tak bahaar id ke din

hain un ke jalwon ki arzaniyan payam-e-nashat

nahin hai dil mein gham-e-rozgar id ke din

dil-e-fasurda mein phir KHun-e-sarKHushi dauDa

wo aa ke mujh se hue ham-kanar id ke din

nigah-e-shauq pe parwana-war girti hain

tajalliyan bhi hain be-iKHtiyar id ke din

na un ki aankhon mein ghussa na kuchh jabin pe shikan

baras raha hai nigahon se pyar id ke din

nigah-e-mehr ki garmi hai raushni dil ki

hai bazm-e-shauq meri kaamgar id ke din

wo fart-e-shauq mein hans hans ke mil rahe hain gale

hai shad 'jauhar'-e-sina-figar id ke din