id

yuuñ lab se apne nikle hai ab bār-bār aah

kartā hai jis tarah ki dil-e-be-qarār aah

ham iid ke bhī din rahe ummīd-vār aah

ho jī meñ apne iid kī farhat se shād-kām

ḳhūbāñ se apne apne liye sab ne dil ke kaam

dil khol khol sab mile aapas meñ ḳhaas o aam

āġhosh-e-ḳhalq gul-badanoñ se bhare tamām

ḳhālī rahā par ek hamārā kanār aah

kyā pūchhte ho shoḳh se milne kī ab ḳhabar

kitnā hī justujū meñ phire ham idhar idhar

lekin milā na ham se vo ayyār fitnagar

milnā to ik taraf hai azīzo ki bhar-nazar

poshāk kī bhī ham ne na dekhī bahār aah

rakhte the ham umiid ye dil meñ ki iid ko

kyā kyā gale lagāveñge dil-bar ko shaad ho

so tū vo aaj bhī na milā shoḳh-e-hīla-jū

thī aas iid kī so ga.ī vo bhī dosto

ab dekheñ kyā kare dil-e-ummīd-vār aah

us sañg-dil kī ham ne ġharaz jab se chaah kī

dekhā na apne dil ko kabhī ek dam ḳhushī

kuchh ab hī us kī jaur-o-ta.addī nahīñ na.ī

har iid meñ hameñ to sadā yaas hī rahī

kāfir kabhī na ham se huā ham-kanār aah

iqrār ham se thā ka.ī din aage iid se

yaanī ki īd-gāh ko jāveñge tum ko le

āḳhir ko ham ko chhoḌ ga.e saath aur ke

ham haath malte rah ga.e aur raah dekhte

kyā kyā ġharaz sahā sitam-e-intizār aah

kyuuñ kar lageñ na dil meñ mire hasratoñ ke tiir

din iid ke bhī mujh se huā vo kanāra-gīr

is dard ko vo samjhe jo ho ishq kā asiir

jis iid meñ ki yaar se milnā na ho 'nazīr'

us ke upar to haif hai aur sad-hazār aah

yun lab se apne nikle hai ab bar-bar aah

karta hai jis tarah ki dil-e-be-qarar aah

hum id ke bhi din rahe ummid-war aah

ho ji mein apne id ki farhat se shad-kaam

KHuban se apne apne liye sab ne dil ke kaam

dil khol khol sab mile aapas mein KHas o aam

aaghosh-e-KHalq gul-badanon se bhare tamam

KHali raha par ek hamara kanar aah

kya puchhte ho shoKH se milne ki ab KHabar

kitna hi justuju mein phire hum idhar idhar

lekin mila na hum se wo ayyar fitnagar

milna to ek taraf hai azizo ki bhar-nazar

poshak ki bhi hum ne na dekhi bahaar aah

rakhte the hum umid ye dil mein ki id ko

kya kya gale lagawenge dil-bar ko shad ho

so tu wo aaj bhi na mila shoKH-e-hila-ju

thi aas id ki so gai wo bhi dosto

ab dekhen kya kare dil-e-ummid-war aah

us sang-dil ki hum ne gharaz jab se chah ki

dekha na apne dil ko kabhi ek dam KHushi

kuchh ab hi us ki jaur-o-taddi nahin nai

har id mein hamein to sada yas hi rahi

kafir kabhi na hum se hua ham-kanar aah

iqrar hum se tha kai din aage id se

yani ki id-gah ko jawenge tum ko le

aaKHir ko hum ko chhoD gae sath aur ke

hum hath malte rah gae aur rah dekhte

kya kya gharaz saha sitam-e-intizar aah

kyun kar lagen na dil mein mere hasraton ke tir

din id ke bhi mujh se hua wo kanara-gir

is dard ko wo samjhe jo ho ishq ka asir

jis id mein ki yar se milna na ho 'nazir'

us ke upar to haif hai aur sad-hazar aah