irani talaba ke nam

ye kaun saḳhī haiñ

jin ke lahū kī

ashrafiyāñ chhan-chhan, chhan-chhan,

dhartī ke paiham pyāse

kashkol meñ Dhaltī jaatī haiñ

kashkol ko bhartī haiñ

ye kaun javāñ haiñ arz-e-ajam

ye lakh-luT

jin ke jismoñ kī

bharpūr javānī kā kundan

yuuñ ḳhaak meñ reza reza hai

yuuñ kūcha kūcha bikhrā hai

ai arz-e-ajam, ai arz-e-ajam!

kyuuñ noch ke hañs hañs pheñk diye

un āñkhoñ ne apne nīlam

un hoñToñ ne apne marjāñ

un hāthoñ kī ''be-kal chāñdī

kis kaam aa.ī kis haath lagī''

ai pūchhne vaale pardesī

ye tifl o javāñ

us nuur ke nau-ras motī haiñ

us aag kī kachchī kaliyāñ haiñ

jis mīThe nuur aur kaḌvī aag

se zulm kī andhī raat meñ phūTā

sub.h-e-baġhāvat kā gulshan

aur sub.h huī man-man, tan-tan,

un jismoñ kā chāñdī sonā

un chehroñ ke nīlam, marjāñ,

jag-mag jag-mag ruḳhshāñ ruḳhshāñ

jo dekhnā chāhe pardesī

paas aa.e dekhe jī bhar kar

ye ziist kī raanī kā jhūmar

ye amn kī devī kā kañgan!

ye kaun saKHi hain

jin ke lahu ki

ashrafiyan chhan-chhan, chhan-chhan,

dharti ke paiham pyase

kashkol mein Dhalti jati hain

kashkol ko bharti hain

ye kaun jawan hain arz-e-ajam

ye lakh-luT

jin ke jismon ki

bharpur jawani ka kundan

yun KHak mein reza reza hai

yun kucha kucha bikhra hai

ai arz-e-ajam, ai arz-e-ajam!

kyun noch ke hans hans phenk diye

un aankhon ne apne nilam

un honTon ne apne marjaan

un hathon ki be-kal chandi

kis kaam aai kis hath lagi

ai puchhne wale pardesi

ye tifl o jawan

us nur ke nau-ras moti hain

us aag ki kachchi kaliyan hain

jis miThe nur aur kaDwi aag

se zulm ki andhi raat mein phuTa

subh-e-baghawat ka gulshan

aur subh hui man-man, tan-tan,

un jismon ka chandi sona

un chehron ke nilam, marjaan,

jag-mag jag-mag ruKHshan ruKHshan

jo dekhna chahe pardesi

pas aae dekhe ji bhar kar

ye zist ki rani ka jhumar

ye amn ki dewi ka kangan!