ijazat

kaash is dil kī tarah koī makāñ bhī hotā

apnī hastī kī tarah apnā jahāñ bhī hotā

zulmat-e-shab meñ tajallī kā gumāñ bhī hotā

mere hoñToñ pe mirā tarz-e-bayāñ bhī hotā

merī yādoñ ko mirī jaan bisar jaane do

baat jo dil pe guzartī hai guzar jaane do

aaj jab tark-e-ta.alluq kā ḳhayāl aayā hai

aisā lagtā hai mohabbat ko zavāl aayā hai

itnī hasrat bharī nazroñ se na dekho mujh ko

merī mahbūb sar-e-rāh na roko mujh ko

daaġh jo dil pe lagā hai ab use saaf karo

maiñ talabgār-e-muāfī huuñ kuchh insāf karo

apne din-rāt kisī tarah basar kar lūñgā

zindagī jaise bhī guzregī guzar kar lūñgā

maiñ tirī zaat se ai dost gila-mand nahīñ

tū ba-har-hāl mere ishq kī pāband nahīñ

ahd-o-paimān sabhī toḌ ke jā saktī ho

merī mahbūb mujhe chhoḌ ke jā saktī ho

kash is dil ki tarah koi makan bhi hota

apni hasti ki tarah apna jahan bhi hota

zulmat-e-shab mein tajalli ka guman bhi hota

mere honTon pe mera tarz-e-bayan bhi hota

meri yaadon ko meri jaan bisar jaane do

baat jo dil pe guzarti hai guzar jaane do

aaj jab tark-e-talluq ka KHayal aaya hai

aisa lagta hai mohabbat ko zawal aaya hai

itni hasrat bhari nazron se na dekho mujh ko

meri mahbub sar-e-rah na roko mujh ko

dagh jo dil pe laga hai ab use saf karo

main talabgar-e-muafi hun kuchh insaf karo

apne din-raat kisi tarah basar kar lunga

zindagi jaise bhi guzregi guzar kar lunga

main teri zat se ai dost gila-mand nahin

tu ba-har-haal mere ishq ki paband nahin

ahd-o-paiman sabhi toD ke ja sakti ho

meri mahbub mujhe chhoD ke ja sakti ho