ek adhuri dastan

vo ik laḌkī

jo ḳhāmoshī meñ bhī aksar chahaktī thī

sub.h se shaam tak aur raat meñ bhī bāteñ kartī thī

sabhoñ ko shaad rakhtī thī bahut masrūr rahtī thī

kabhī bādal kabhī ḳhushbū kabhī gul-rañg kī sūrat

barastī thī bikhartī thī badaltī thī

magar mahsūs hotā thā hamesha paas rahtī hai

jo vo anjān bantī thī

aziiz az jaan lagtī thī

kabhī chanchal havā panchhī ke pañkhoñ aur nadī ke lams kī mānind

utar aatī thī dil meñ ruuh ko pur-kaif rakhtī thī

kabhī hoñToñ ke ras āñkhoñ kī shabnam gāloñ ke ḳhush-rañg mausam se

nashe ko jhiil ko gulbun ko bhī vo maat detī thī

maiñ us ke lams se ruḳhsāroñ kī dhīmī tamāzat garm sāñsoñ se

bahut qurbat bahut apnā.iyat mahsūs kartā thā

zehn ke paas paatā thā use apnā samajhtā thā

magar phir kyā huā ik din ki ik bad-baḳht Daa.in ne

ḳhudā jaane kahāñ bhejā ki sab lā-ilm haiñ us se

magar pahuñche hue darvesh ne ye bhed kholā hai

baserā us kā ab hai chāñdnī ke kunj

sitāroñ ke baġhīchoñ meñ

vo un kī sair kartī hai magar ġhamgīn rahtī hai

use sab vahm kahte haiñ ḳhilāf-e-aql kahte haiñ

magar pakkā yaqīñ hai jab koī TuuTā huā taarā

zamīñ ko chūmne aa.egā vo bhī saath aa.egī

phir apne saath vo ḳhushiyoñ ke sad.hā gul bhī lā.egī

so har shab jāgtā huuñ

raah meñ ākāsh kī āñkheñ bichhātā huuñ

magar jo taarā aatā hai zamīñ tak aa nahīñ paatā

wo ek laDki

jo KHamoshi mein bhi aksar chahakti thi

subh se sham tak aur raat mein bhi baaten karti thi

sabhon ko shad rakhti thi bahut masrur rahti thi

kabhi baadal kabhi KHushbu kabhi gul-rang ki surat

barasti thi bikharti thi badalti thi

magar mahsus hota tha hamesha pas rahti hai

jo wo anjaan banti thi

aziz az jaan lagti thi

kabhi chanchal hawa panchhi ke pankhon aur nadi ke lams ki manind

utar aati thi dil mein ruh ko pur-kaif rakhti thi

kabhi honTon ke ras aankhon ki shabnam galon ke KHush-rang mausam se

nashe ko jhil ko gulbun ko bhi wo mat deti thi

main us ke lams se ruKHsaron ki dhimi tamazat garm sanson se

bahut qurbat bahut apnaiyat mahsus karta tha

zehn ke pas pata tha use apna samajhta tha

magar phir kya hua ek din ki ek bad-baKHt Dain ne

KHuda jaane kahan bheja ki sab la-ilm hain us se

magar pahunche hue darwesh ne ye bhed khola hai

basera us ka ab hai chandni ke kunj

sitaron ke baghichon mein

wo un ki sair karti hai magar ghamgin rahti hai

use sab wahm kahte hain KHilaf-e-aql kahte hain

magar pakka yaqin hai jab koi TuTa hua tara

zamin ko chumne aaega wo bhi sath aaegi

phir apne sath wo KHushiyon ke sadha gul bhi laegi

so har shab jagta hun

rah mein aakash ki aankhen bichhata hun

magar jo tara aata hai zamin tak aa nahin pata