ek barhaman ne kaha hai ki ye sal achchha hai

zulm kī raat bahut jald Talegī ab to

aag chūlhoñ meñ har ik roz jalegī ab to

bhuuk ke maare koī bachcha nahīñ ro.egā

chain kī niiñd har ek shaḳhs yahāñ so.egā

āñdhī nafrat kī chalegī na kahīñ ab ke baras

pyaar kī fasl ugā.egī zamīñ ab ke baras

hai yaqīñ ab na koī shor-sharāba hogā

zulm hogā na kahīñ ḳhūn-ḳharābā hogā

os aur dhuup ke sadme na sahegā koī

ab mire desh meñ beghar na rahegā koī

na.e va.adoñ kā jo Daalā hai vo jaal achchhā hai

rahnumāoñ ne kahā hai ki ye saal achchhā hai

dil ke ḳhush rakhne ko ġhālib ye ḳhayāl achchhā hai

zulm ki raat bahut jald Talegi ab to

aag chulhon mein har ek roz jalegi ab to

bhuk ke mare koi bachcha nahin roega

chain ki nind har ek shaKHs yahan soega

aandhi nafrat ki chalegi na kahin ab ke baras

pyar ki fasl ugaegi zamin ab ke baras

hai yaqin ab na koi shor-sharaba hoga

zulm hoga na kahin KHun-KHaraba hoga

os aur dhup ke sadme na sahega koi

ab mere desh mein beghar na rahega koi

nae wadon ka jo Dala hai wo jal achchha hai

rahnumaon ne kaha hai ki ye sal achchha hai

dil ke KHush rakhne ko ghaalib ye KHayal achchha hai