ek bewafa ke nam

tere bhī dil meñ huuk sī uTThe ḳhudā kare

tū bhī hamārī yaad meñ taḌpe ḳhudā kare

majrūh ho balā se tire husn kā ġhurūr

par tujh ko chashm-e-shauq na dekhe ḳhudā kare

kho jaa.eñ tere husn kī ra.anā.iyāñ tamām

terī adā kisī ko na bhaa.e ḳhudā kare

merī hī tarah kashti-e-dil ho tirī tabāh

tūfān itne zor kā uTThe ḳhudā kare

rāhoñ ke pech-o-ḳham meñ rahe tā-hayāt gum

manzil tire qarīb na aa.e ḳhudā kare

zulmat ho tū ho aur tirī rahguzār ho

duniyā meñ terī sub.h na phūTe ḳhudā kare

tujh par nashāt-o-aish kī rāteñ harām hoñ

mar jaa.eñ tere saaz ke naġhme ḳhudā kare

aa.eñ na tere baaġh meñ jhoñke nasīm ke

terā gul-e-shabāb na mahke ḳhudā kare

har lamha terī ruuh ko ik be-kalī sī ho

aur be-kalī meñ niiñd na aa.e ḳhudā kare

ho tere dil meñ merī ḳhalish merī aarzū

mere baġhair chain na aa.e ḳhudā kare

tū jā rahī hai bazm-e-tarab meñ to ḳhair jā

par terā jī vahāñ bhī na bahle ḳhudā kare

al-muḳhtasar hoñ jitne sitam tujh pe TuuT jaa.eñ

lekin ye rabt-e-zīst na TuuTe ḳhudā kare

jo kuchh maiñ kah gayā huuñ junūñ meñ vo sab ġhalat

tujh par koī bhī aañch na aa.e ḳhudā kare

tū hai matā-e-qalb-o-nazar bevafā sahī

hai raushnī-e-dāġh-e-jigar bevafā sahī

tere bhi dil mein huk si uTThe KHuda kare

tu bhi hamari yaad mein taDpe KHuda kare

majruh ho bala se tere husn ka ghurur

par tujh ko chashm-e-shauq na dekhe KHuda kare

kho jaen tere husn ki ranaiyan tamam

teri ada kisi ko na bhae KHuda kare

meri hi tarah kashti-e-dil ho teri tabah

tufan itne zor ka uTThe KHuda kare

rahon ke pech-o-KHam mein rahe ta-hayat gum

manzil tere qarib na aae KHuda kare

zulmat ho tu ho aur teri rahguzar ho

duniya mein teri subh na phuTe KHuda kare

tujh par nashat-o-aish ki raaten haram hon

mar jaen tere saz ke naghme KHuda kare

aaen na tere bagh mein jhonke nasim ke

tera gul-e-shabab na mahke KHuda kare

har lamha teri ruh ko ek be-kali si ho

aur be-kali mein nind na aae KHuda kare

ho tere dil mein meri KHalish meri aarzu

mere baghair chain na aae KHuda kare

tu ja rahi hai bazm-e-tarab mein to KHair ja

par tera ji wahan bhi na bahle KHuda kare

al-muKHtasar hon jitne sitam tujh pe TuT jaen

lekin ye rabt-e-zist na TuTe KHuda kare

jo kuchh main kah gaya hun junun mein wo sab ghalat

tujh par koi bhi aanch na aae KHuda kare

tu hai mata-e-qalb-o-nazar bewafa sahi

hai raushni-e-dagh-e-jigar bewafa sahi