ek gum-shuda shahar

baḌā shauq thā

ki baseñ shahr-e-lahore meñ

chhoḌ kar zindagī ye mazāfāt kī

chal raheñ us nigār-e-vatan meñ

ki jis meñ haiñ har-sū mahaktī fazā.eñ

barastī haiñ maḳhmūr kaalī ghaTā.eñ

ye lahore thā

mere ḳhvāboñ kā maskan

mirī chāhatoñ kā ḳhutan

guzāre the ahd-e-javānī meñ maiñ ne

yahāñ saiñkaḌoñ din

baras-hā-baras tak

rahā maiñ muqayyad

bahut duur is ek chhoTe nagar meñ

vo chhūTā nagar jis ne āsūdgī dī

diyā rizq bhī garche mujh ko farāvāñ

magar mere dil meñ vo utrā nahīñ ek din bhī

zamīn chāñd mausam sitāre

sabhī ek se the

magar phir bhī mujh ko vo bhāyā nahīñ ek din bhī

mujhe āḳhirash zindagī le hī aa.ī

isī mere ḳhvāboñ ke ghar meñ

samundar kī sūrat ufuq-tā-ufuq

duur phaile nagar meñ

va-lekin vo shahr-e-nigārāñ vo shahr-e-ḳhutan

merī yādoñ kā maskan

na jaane kahāñ hai?

use aaj tak DhūñD paayā nahīñ maiñ

na vo mall hai na vo shimla pahāḌī

na TamTam na Tāñga na ik aadh gaaḌī

jamāl-e-sahar hai na mahkī fazā.eñ

samā.at pe bār-e-garāñ motoroñ kī sadā.eñ

hai shor-e-qayāmat dhuāñ hī dhuāñ hai

mirā shahr lahore jaane kahāñ hai

baDa shauq tha

ki basen shahr-e-lahore mein

chhoD kar zindagi ye mazafat ki

chal rahen us nigar-e-watan mein

ki jis mein hain har-su mahakti fazaen

barasti hain maKHmur kali ghaTaen

ye lahore tha

mere KHwabon ka maskan

meri chahaton ka KHutan

guzare the ahd-e-jawani mein main ne

yahan sainkaDon din

baras-ha-baras tak

raha main muqayyad

bahut dur is ek chhoTe nagar mein

wo chhuTa nagar jis ne aasudgi di

diya rizq bhi garche mujh ko farawan

magar mere dil mein wo utra nahin ek din bhi

zamin chand mausam sitare

sabhi ek se the

magar phir bhi mujh ko wo bhaya nahin ek din bhi

mujhe aaKHirash zindagi le hi aai

isi mere KHwabon ke ghar mein

samundar ki surat ufuq-ta-ufuq

dur phaile nagar mein

wa-lekin wo shahr-e-nigaran wo shahr-e-KHutan

meri yaadon ka maskan

na jaane kahan hai?

use aaj tak DhunD paya nahin main

na wo mall hai na wo shimla pahaDi

na TamTam na Tanga na ek aadh gaDi

jamal-e-sahar hai na mahki fazaen

samaat pe bar-e-garan motoron ki sadaen

hai shor-e-qayamat dhuan hi dhuan hai

mera shahr lahore jaane kahan hai