ek nanha sa ghar

tumheñ ik ḳhūbsūrat nanhe se

ghar kī tamannā thī

jise tum apnā kah saktīñ

sajā saktīñ jahāñ ke bām-o-dar ko

apnī marzī se

magar afsos umr-e-muḳhtasar guzrī

kirā.e ke makānoñ meñ

zamāna kaj-adā hai

jīte-jī ik qata-e-arāzī nahīñ detā

ba-juz daulat

magar jab ḳhaak ho jaa.eñ

to marqad ke liye mil jaa.e

zamīñ ham ko binā māñge

chalo achchhā huā

tum jā basīñ

shahr-e-ḳhamoshāñ meñ

banā ke chhoTā sā ik ghar

tamannā to huī puurī

sajā lo ab isī ke bām-o-dar ko

apnī marzī se

tumhein ek KHubsurat nanhe se

ghar ki tamanna thi

jise tum apna kah saktin

saja saktin jahan ke baam-o-dar ko

apni marzi se

magar afsos umr-e-muKHtasar guzri

kirae ke makanon mein

zamana kaj-ada hai

jite-ji ek qata-e-araazi nahin deta

ba-juz daulat

magar jab KHak ho jaen

to marqad ke liye mil jae

zamin hum ko bina mange

chalo achchha hua

tum ja basin

shahr-e-KHamoshan mein

bana ke chhoTa sa ek ghar

tamanna to hui puri

saja lo ab isi ke baam-o-dar ko

apni marzi se