ek shahr tha ek bagh tha

ik shahr thā ik baaġh thā

ik shahr thā

yā taaza mevoñ se ladā ik baaġh thā

ik baaġh thā

yā shoḳh rañgoñ se bharā bāzār thā

bāzār thā yā jugnuoñ kī raushnī se kheltī ik raat thī

ik raat thī

yā gungunātī jhūmtī

naġhmāt kī bārish meñ bhīgī

vasl kī sauġhāt thī

ik shahr thā ik baaġh thā ik raat thī

aur un ke dāman meñ

bahār-e-vasl kī sauġhāt thī

ik roz rañg-o-nūr ke mausam ko

bād-e-shart uḌā kar le ga.ī

ik mauj-e-ḳhūñ kahiye use

us shahr ke us baaġh ke

nām-o-nishāñ saare bahā kar le ga.ī

ai nauhagar

ai rāqim-e-afsāna-e-zer-o-zabar

ai chashm-e-hairat chashm-e-tar

ibrat kī jā hai kis qadar

ab yaad kā hai ek afsurda nagar

is shahr meñ

kuchh der ko Thahreñ zarā

nauha kareñ

qissa likheñ

tārīḳh ke aurāq meñ

ik baab kholeñ yaad kā

taqdīr-e-hast-o-būd kā

maġhmūm afsāna likheñ

ek shahr tha ek bagh tha

ek shahr tha

ya taza mewon se lada ek bagh tha

ek bagh tha

ya shoKH rangon se bhara bazar tha

bazar tha ya jugnuon ki raushni se khelti ek raat thi

ek raat thi

ya gungunati jhumti

naghmat ki barish mein bhigi

wasl ki saughat thi

ek shahr tha ek bagh tha ek raat thi

aur un ke daman mein

bahaar-e-wasl ki saughat thi

ek roz rang-o-nur ke mausam ko

baad-e-shart uDa kar le gai

ek mauj-e-KHun kahiye use

us shahr ke us bagh ke

nam-o-nishan sare baha kar le gai

ai nauhagar

ai raqim-e-afsana-e-zer-o-zabar

ai chashm-e-hairat chashm-e-tar

ibrat ki ja hai kis qadar

ab yaad ka hai ek afsurda nagar

is shahr mein

kuchh der ko Thahren zara

nauha karen

qissa likhen

tariKH ke auraq mein

ek bab kholen yaad ka

taqdir-e-hast-o-bud ka

maghmum afsana likhen