ek umr ki der

safha-e-dil se tirā naam miTāne meñ mujhe der lagī

puurī ik umr kī der!

ashk-e-ġham... qatra-e-ḳhūñ... āb-e-masarrat se

miTā kar dekhā

rañg-e-duniyā bhī milaa... rañg-e-tamannā bhī lagā kar dekhā

maktab-e-ishq meñ jitne bhī sabaq yaad kiye

yaad rahe

arsa-e-zīst meñ ḳhvāboñ ke ḳharābe the bahut

in ḳharāboñ meñ

ḳhayāloñ ke nagar jitne bhī ābād kiye

yaad rahe!

gosha-e-rañj meñ... hañgāma-e-duniyā se pare

kaun ik hijr ke shīshe meñ utartā thā

tire aks-e-dil-ārām ke saath

kis kī ummīd ke raste pe koī dā.era-e-nūr na thā

kis kī māyūs nigāhoñ meñ bikharte the

tamannā ke ujāle bhii... añdheroñ kī tarah

roz-e-raushan meñ bhī ho jaatī thī

kis dil ke mazāfāt meñ raat,

tū ne jaanā hī nahīñ

aur tirī ḳhud-sāḳhta be-ḳhabarī ko

qissa-e-dard sunāne meñ mujhe der lagī

āñsuoñ se mirā ā.īna-e-ġham dhundlāyā

ek sardāba-e-daurāñ meñ jo poshīda-o-nādīda rahī thī

ab tak

is tan-e-zār ko... vo zindagī hī bhuul ga.ī

dil se lipTī huī yak-rañg udāsī ke sabab

rañg-o-rāmish meñ basī zinda-dilī bhuul ga.ī

par tirī shakl bhulāne meñ mujhe der lagī

puurī ik umr kī der

umr...

jo lamha-e-jāñ ke sivā kuchh bhī na thī

umr... jo terī tamannā ke sivā kuchh bhī na thī

bas vahī umr batāne meñ... mujhe der lagī!

safha-e-dil se tera nam miTane mein mujhe der lagi

puri ek umr ki der!

ashk-e-gham qatra-e-KHun aab-e-masarrat se

miTa kar dekha

rang-e-duniya bhi mila rang-e-tamanna bhi laga kar dekha

maktab-e-ishq mein jitne bhi sabaq yaad kiye

yaad rahe

arsa-e-zist mein KHwabon ke KHarabe the bahut

in KHarabon mein

KHayalon ke nagar jitne bhi aabaad kiye

yaad rahe!

gosha-e-ranj mein hangama-e-duniya se pare

kaun ek hijr ke shishe mein utarta tha

tere aks-e-dil-aram ke sath

kis ki ummid ke raste pe koi daera-e-nur na tha

kis ki mayus nigahon mein bikharte the

tamanna ke ujale bhi andheron ki tarah

roz-e-raushan mein bhi ho jati thi

kis dil ke mazafat mein raat,

tu ne jaana hi nahin

aur teri KHud-saKHta be-KHabari ko

qissa-e-dard sunane mein mujhe der lagi

aansuon se mera aaina-e-gham dhundlaya

ek sardaba-e-dauran mein jo poshida-o-nadida rahi thi

ab tak

is tan-e-zar ko wo zindagi hi bhul gai

dil se lipTi hui yak-rang udasi ke sabab

rang-o-ramish mein basi zinda-dili bhul gai

par teri shakl bhulane mein mujhe der lagi

puri ek umr ki der

umr

jo lamha-e-jaan ke siwa kuchh bhi na thi

umr jo teri tamanna ke siwa kuchh bhi na thi

bas wahi umr batane mein mujhe der lagi!