ilm ka maqam

aao bachcho tum ko batā.eñ

āñkhoñ dekhā haal sunā.eñ

ham ne is duniyā meñ rah kar

kaisā kaisā dekhā manzar

garmī dekhī sardī dekhī

tezī dekhī narmī dekhī

bādal dekhā paanī dekhā

dariyā kī tuġhyānī dekhā

kelā dekhā aam bhī dekhā

pista aur bādām bhī dekhā

rañg birañge phuul bhī dekhe

hare gulābī niile piile

umr kī sub.h shaam bhī dekhā

taklīf-o-ārām bhī dekhā

mazdūroñ kī mehnat dekhī

un kī qadr-o-qīmat dekhī

be-kāroñ kā ronā dekhā

vaqt ko apne khonā dekhā

aur na pūchho kyā kyā dekhā

chaltā phirtā paisa dekhā

paisa hai ik aisī tāqat

jis meñ hai duniyā kī azmat

jāhil ko bhī aaqil ko bhī

nāqis ko bhī kāmil ko bhī

paise kā dam bharte dekhā

jhuuT ko bhī sach karte dekhā

lekin daulat se bhī baḌh kar

ham ne dekhā hai vo gauhar

paise par bhī raaj hai jis kā

paisa bhī muhtāj hai jis kā

jis kī hai duniyā bhī saa.il

jis kā hai paisa bhī qaa.il

jis ne sab ko shaad kiyā hai

paise ko ījād kiyā hai

jis kī badaulat aage baḌh kar

aadmī pahuñchā chāñd ke uupar

us gauhar kā naam hai pyārā

us kā saarā kaam hai pyārā

ilm use kahte haiñ jahāñ meñ

azmat jis kī kaun-o-makāñ meñ

ilm hai duniyā kī sachchā.ī

duur huī hai is se burā.ī

aao bachcho tum ko bataen

aankhon dekha haal sunaen

hum ne is duniya mein rah kar

kaisa kaisa dekha manzar

garmi dekhi sardi dekhi

tezi dekhi narmi dekhi

baadal dekha pani dekha

dariya ki tughyani dekha

kela dekha aam bhi dekha

pista aur baadam bhi dekha

rang birange phul bhi dekhe

hare gulabi nile pile

umr ki subh sham bhi dekha

taklif-o-aram bhi dekha

mazduron ki mehnat dekhi

un ki qadr-o-qimat dekhi

be-karon ka rona dekha

waqt ko apne khona dekha

aur na puchho kya kya dekha

chalta phirta paisa dekha

paisa hai ek aisi taqat

jis mein hai duniya ki azmat

jahil ko bhi aaqil ko bhi

naqis ko bhi kaamil ko bhi

paise ka dam bharte dekha

jhuT ko bhi sach karte dekha

lekin daulat se bhi baDh kar

hum ne dekha hai wo gauhar

paise par bhi raj hai jis ka

paisa bhi muhtaj hai jis ka

jis ki hai duniya bhi sail

jis ka hai paisa bhi qail

jis ne sab ko shad kiya hai

paise ko ijad kiya hai

jis ki badaulat aage baDh kar

aadmi pahuncha chand ke upar

us gauhar ka nam hai pyara

us ka sara kaam hai pyara

ilm use kahte hain jahan mein

azmat jis ki kaun-o-makan mein

ilm hai duniya ki sachchai

dur hui hai is se burai