ilm ke saudagar

ham ilm ke saudāgar haiñ aur maktab meñ tijārat karte haiñ

sab karte haiñ tārīf hamārī dil meñ hiqārat karte haiñ

ham meñ se kuchh aise bhī haiñ jo ilm se bilkul haiñ aarī

behtar rahtā hote vo agar kisī aur hī chiiz ke byopārī

aise bhī haiñ jo auroñ kī tarah chīzoñ meñ milāvaT karte haiñ

jo ilm kī chorī karte haiñ vo jhūTī sajāvaT karte haiñ

kuchh aise bad-qismat bhī haiñ jo maal to achchhā rakhte haiñ

aur bech nahīñ sakte is ko ismat kī tarah bāzāroñ meñ

tash.hīr ke raaz se nā-vāqif ye sāda-dil be-nām bhī haiñ

aur jis ko ġhurūr-e-fan kahte haiñ us se kuchh bad-nām bhī haiñ

hai un ke nasīb meñ farhādī aur hai shīrīñ auroñ ke liye

kāñToñ kā taaj hai un ke liye tauq-e-zarrīñ auroñ ke liye

hum ilm ke saudagar hain aur maktab mein tijarat karte hain

sab karte hain tarif hamari dil mein hiqarat karte hain

hum mein se kuchh aise bhi hain jo ilm se bilkul hain aari

behtar rahta hote wo agar kisi aur hi chiz ke byopari

aise bhi hain jo auron ki tarah chizon mein milawaT karte hain

jo ilm ki chori karte hain wo jhuTi sajawaT karte hain

kuchh aise bad-qismat bhi hain jo mal to achchha rakhte hain

aur bech nahin sakte is ko ismat ki tarah bazaron mein

tashhir ke raaz se na-waqif ye sada-dil be-nam bhi hain

aur jis ko ghurur-e-fan kahte hain us se kuchh bad-nam bhi hain

hai un ke nasib mein farhadi aur hai shirin auron ke liye

kanTon ka taj hai un ke liye tauq-e-zarrin auron ke liye