iltija

tum ruuTh chuke dil TuuT chukā ab yaad na aao rahne do

is mahfil-e-ġham meñ aane kī zahmat na uThāo rahne do

ye sach ki suhāne maazī ke lamhoñ ko bhulānā khel nahīñ

ye sach ki bhaḌakte sho.aloñ se dāman ko bachānā khel nahīñ

riste hue dil ke zaḳhmoñ ko duniyā se chhupānā khel nahīñ

aurāq-e-nazar se jalvoñ kī tahrīr miTānā khel nahīñ

lekin ye mohabbat ke naġhme is vaqt na gaao rahne do

jo aag dabī hai siine meñ hoñToñ pe na laao rahne do

jaarī haiñ vatan kī rāhoñ meñ har samt lahū ke favvāre

dukh-dard kī choTeñ khā khā kar larzāñ haiñ diloñ ke gahvāre

añgusht ba-lab haiñ shams o qamar hairān o pareshāñ haiñ taare

haiñ bād-e-sahar ke jhoñke bhī tūfān-e-musalsal ke dhāre

ab fursat-e-nāv-nosh kahāñ ab yaad na aao rahne do

tūfān meñ rahne vāloñ ko ġhāfil na banāo rahne do

maanā ki mohabbat kī ḳhātir ham tum ne qasam bhī khaa.ī thī

ye amn-o-sukūñ se duur fazā paiġhām-e-sukūñ bhī laa.ī thī

vo daur bhī thā jab duniyā kī har shai pe javānī chhā.ī thī

ḳhvāboñ kī nashīlī bad-mastī ma.asūm diloñ par chhā.ī thī

lekin vo zamāna duur gayā ab yaad na aao rahne do

jis raah pe jaanā lāzim hai us se na haTāo rahne do

ab vaqt nahīñ un naġhmoñ kā jo ḳhvāboñ ko bedār kareñ

ab vaqt hai aise na.aroñ kā jo sotoñ ko hoshyār kareñ

duniyā ko zarūrat hai un kī jo talvāroñ ko pyaar kareñ

jo qaum o vatan ke qadmoñ par qurbānī deñ īsār kareñ

rūdād-e-mohabbat phir kahnā ab maan bhī jaao rahne do

jaadū na jagāo rahne do fitne na uThāo rahne do

maiñ zahr-e-haqīqat kī talḳhī ḳhvāboñ meñ chhupā.ūñgā kab tak

ġhurbat ke dahakte sho.aloñ se dāman ko bachā.ūñgā kab tak

āshob-e-jahāñ kī devī se yuuñ aañkh churāñūñgā kab tak

jis farz ko puurā karnā hai vo farz bhulā.ūñgā kab tak

ab taab nahīñ nazzāre kī jalve na dikhāo rahne do

ḳhurshīd-e-mohabbat ke ruḳh se parde na uThāo rahne do

mumkin hai zamāna ruḳh badle ye daur-e-halākat miT jaa.e

ye zulm kī duniyā karvaT le ye ahd-e-zalālat miT jaa.e

daulat ke farebī bandoñ kā ye kibr aur naḳhvat miT jaa.e

barbād vatan ke mahloñ se ġhairoñ kī hukūmat miT jaa.e

us vaqt ba-nām-e-ahd-e-vafā maiñ ḳhud bhī tumheñ yaad ā.ūñgā

muñh moḌ ke saarī duniyā se ulfat kā sabaq duhrā.ūñgā

tum ruTh chuke dil TuT chuka ab yaad na aao rahne do

is mahfil-e-gham mein aane ki zahmat na uThao rahne do

ye sach ki suhane mazi ke lamhon ko bhulana khel nahin

ye sach ki bhaDakte shoalon se daman ko bachana khel nahin

riste hue dil ke zaKHmon ko duniya se chhupana khel nahin

auraq-e-nazar se jalwon ki tahrir miTana khel nahin

lekin ye mohabbat ke naghme is waqt na gao rahne do

jo aag dabi hai sine mein honTon pe na lao rahne do

jari hain watan ki rahon mein har samt lahu ke fawware

dukh-dard ki choTen kha kha kar larzan hain dilon ke gahware

angusht ba-lab hain shams o qamar hairan o pareshan hain tare

hain baad-e-sahar ke jhonke bhi tufan-e-musalsal ke dhaare

ab fursat-e-naw-nosh kahan ab yaad na aao rahne do

tufan mein rahne walon ko ghafil na banao rahne do

mana ki mohabbat ki KHatir hum tum ne qasam bhi khai thi

ye amn-o-sukun se dur faza paigham-e-sukun bhi lai thi

wo daur bhi tha jab duniya ki har shai pe jawani chhai thi

KHwabon ki nashili bad-masti masum dilon par chhai thi

lekin wo zamana dur gaya ab yaad na aao rahne do

jis rah pe jaana lazim hai us se na haTao rahne do

ab waqt nahin un naghmon ka jo KHwabon ko bedar karen

ab waqt hai aise naron ka jo soton ko hoshyar karen

duniya ko zarurat hai un ki jo talwaron ko pyar karen

jo qaum o watan ke qadmon par qurbani den isar karen

rudad-e-mohabbat phir kahna ab man bhi jao rahne do

jadu na jagao rahne do fitne na uThao rahne do

main zahr-e-haqiqat ki talKHi KHwabon mein chhupaunga kab tak

ghurbat ke dahakte shoalon se daman ko bachaunga kab tak

aashob-e-jahan ki dewi se yun aankh churanunga kab tak

jis farz ko pura karna hai wo farz bhulaunga kab tak

ab tab nahin nazzare ki jalwe na dikhao rahne do

KHurshid-e-mohabbat ke ruKH se parde na uThao rahne do

mumkin hai zamana ruKH badle ye daur-e-halakat miT jae

ye zulm ki duniya karwaT le ye ahd-e-zalalat miT jae

daulat ke farebi bandon ka ye kibr aur naKHwat miT jae

barbaad watan ke mahlon se ghairon ki hukumat miT jae

us waqt ba-nam-e-ahd-e-wafa main KHud bhi tumhein yaad aaunga

munh moD ke sari duniya se ulfat ka sabaq duhraunga