imbisat-e-azli

ūñchī nīchī duub par lahrātā huā kaalā naag

jhiil ke bāñhoñ se phūTtā huā jvālāmukhī

rañg-birañge panchhī ko panjoñ meñ dabā.e hue baaz

chaTTānoñ ke pīchhe murda jānvar kī sāf-o-shaffāf ThiThurī par

bhāgte hue siyāh chūhoñ kī qatār

chāñdnī raat meñ machhlī par jhapaTtā huā ūd-bilāv

patiñge ko pakaḌne ke liye lapaktī huī chhipkilī

surma.ī shaam ke malgaje ākāsh par chaḌhtī huī āñdhī

ye saare manāzir mahā-nagar ke ek kamre meñ

video par dekh rahā huuñ

aur

ahd-e-hajar ke apne buzurgoñ ke fitrī ḳhauf-o-tajassus se bhare hue

imbisāt ko apnī ragoñ se

sargoshiyāñ karte hue pā rahā huuñ

unchi nichi dub par lahraata hua kala nag

jhil ke banhon se phuTta hua jwalamukhi

rang-birange panchhi ko panjon mein dabae hue baz

chaTTanon ke pichhe murda jaanwar ki saf-o-shaffaf ThiThuri par

bhagte hue siyah chuhon ki qatar

chandni raat mein machhli par jhapaTta hua ud-bilaw

patinge ko pakaDne ke liye lapakti hui chhipkili

surmai sham ke malgaje aakash par chaDhti hui aandhi

ye sare manazir maha-nagar ke ek kamre mein

wideo par dekh raha hun

aur

ahd-e-hajar ke apne buzurgon ke fitri KHauf-o-tajassus se bhare hue

imbisat ko apni ragon se

sargoshiyan karte hue pa raha hun