imkan

mire lafz mere lahū kī lau

mire dil kī lai jise nūr-e-nai kī talāsh hai

mire ashk mere vo harf haiñ jo mire laboñ pe na aa sake

maiñ agar kahūñ bhī to kyā kahūñ

ki hanūz merī zabāñ meñ hai vahī nā-kushūda-girah ki thī

tū sune to abr bhī naġhma hai

tū sune to mauj-e-havā bhī raag kī taan hai

tū sune to paat bhī phuul bhī kisī gupt giit ke bol haiñ

gul-o-yāsman hoñ ki mehr-o-māh

har ik apnī saut-o-sadā meñ kāmil-o-tām hai

mirā lafz nāqis-o-ḳhām hai

rahā nā-tamām jo kah sakā

jo na kah sakā vahī baat asl-e-kalām hai

tū sune to koī ajab nahīñ

ki mirī navā kā hunar khule

tū sune to koī ajab nahīñ

ki suḳhan kā sātvāñ dar khule

mere lafz mere lahu ki lau

mere dil ki lai jise nur-e-nai ki talash hai

mere ashk mere wo harf hain jo mere labon pe na aa sake

main agar kahun bhi to kya kahun

ki hanuz meri zaban mein hai wahi na-kushuda-girah ki thi

tu sune to abr bhi naghma hai

tu sune to mauj-e-hawa bhi rag ki tan hai

tu sune to pat bhi phul bhi kisi gupt git ke bol hain

gul-o-yasman hon ki mehr-o-mah

har ek apni saut-o-sada mein kaamil-o-tam hai

mera lafz naqis-o-KHam hai

raha na-tamam jo kah saka

jo na kah saka wahi baat asl-e-kalam hai

tu sune to koi ajab nahin

ki meri nawa ka hunar khule

tu sune to koi ajab nahin

ki suKHan ka satwan dar khule