imroz

gila hai kam-nigahī ko meñ kāmgār nahīñ

hanūz nudrat-e-kirdār āshkār nahīñ

mirā vo soz hai nā-mahramoñ meñ be-ta.abīr

mah-o-sitāra ko jis ke liye qarār nahīñ

mirā sukūt javāb aa.ina hai un ke liye

vo jin kī raa.e meñ dīvāna honhār nahīñ

nahīñ hai koī daraḳhshanda barq jis kī misāl

mushābah jis ke koī guhar-e-ābdār nahīñ

sazā-e-ḳhvesh hai ḳhud sat.h-e-chashm-e-zāhir meñ

jise ma.ānī-e-shā.ir pe e'tibār nahīñ

sabab haiñ aur bhī lekin ba-juz do-harf javāb

adā-e-zail se maqsūd zīnhār nahīñ

tumhīñ kaho hai mirā kaun sā karam-farmā

ki jis kī ḳhātir-e-bargashta meñ ġhubār nahīñ

ho shād-kāmī-e-gul-gasht-e-zarf shā.ir kyā

musāf-e-shahr charāgah-o-chashma-sāz nahīñ

shaguft-e-taba ke sāmān-o-sāz haiñ nāpaid

sabā nahīñ chamanistāñ nahīñ bahār nahīñ

mashām-e-naġhma hai āzurda chahchahe ḳhāmosh

navā-e-ġhuncha nahīñ nik.hat-e-hazār nahīñ

nahīñ bat-e-mai-e-sāqī na barbat-e-mutrib

bisāt-e-gul nahīñ āġhosh-e-gul-ezār nahīñ

muhīt-e-ġhurbat-e-bālīñ hai ḳhānumāñ-sozī

koī habīb nahīñ koī ġham-gusār nahīñ

mire kamāl kī zāmin hai ḳhud ye qismat-e-ġham

ḳhushā maiñ ḳhasta-e-ġham to huuñ sogvār nahīñ

gila hai kam-nigahi ko mein kaamgar nahin

hanuz nudrat-e-kirdar aashkar nahin

mera wo soz hai na-mahramon mein be-tabir

mah-o-sitara ko jis ke liye qarar nahin

mera sukut jawab aaina hai un ke liye

wo jin ki rae mein diwana honhaar nahin

nahin hai koi daraKHshanda barq jis ki misal

mushabah jis ke koi guhar-e-abdar nahin

saza-e-KHwesh hai KHud sath-e-chashm-e-zahir mein

jise maani-e-shair pe e'tibar nahin

sabab hain aur bhi lekin ba-juz do-harf jawab

ada-e-zail se maqsud zinhaar nahin

tumhin kaho hai mera kaun sa karam-farma

ki jis ki KHatir-e-bargashta mein ghubar nahin

ho shad-kaami-e-gul-gasht-e-zarf shair kya

musaf-e-shahr charagah-o-chashma-saz nahin

shaguft-e-taba ke saman-o-saz hain napaid

saba nahin chamanistan nahin bahaar nahin

masham-e-naghma hai aazurda chahchahe KHamosh

nawa-e-ghuncha nahin nikhat-e-hazar nahin

nahin bat-e-mai-e-saqi na barbat-e-mutrib

bisat-e-gul nahin aaghosh-e-gul-ezar nahin

muhit-e-ghurbat-e-baalin hai KHanuman-sozi

koi habib nahin koi gham-gusar nahin

mere kamal ki zamin hai KHud ye qismat-e-gham

KHusha main KHasta-e-gham to hun sogwar nahin