imtihan

imtihāñ sar par hai laḌke laḌkiyāñ haiñ aur kitāb

date-shēt aa.ī to goyā aa gayā yaum-ul-hisāb

sirf ik kāġhaz ke purze se huā ye inqalāb

ḳhud-ba-ḳhud har ik sharārat kā huā hai sadd-e-bāb

pahle thiiñ vo shoḳhiyāñ jo āfat-e-jāñ ho ga.iiñ

''lekin ab naqsh-o-nigār-e-tāq-e-nisyāñ ho ga.īñ''

vaqt raTne ke liye kam rah gayā zyāda hai kaam

saal bhar jin ko na dekhā vo ḳhulāse nek-nām

sāmne rakkhe haiñ un ko jhuk ke karte haiñ salām

un kī puujā hī meñ saarā vaqt hotā hai tamām

television bhī nahīñ ġhā.eb hue haiñ saare khel

Daal kar kolhū meñ bachchoñ ko nikālo un kā tel

āj-kal bhūle hue haiñ sab election aur debate

practical kī copiyoñ ke āj-kal bharte haiñ peT

hāzirī ab kaun bole kaun ab aa.egā leT

college aur schōl haiñ sunsān ḳhālī in ke gate

band hai kamre ke andar gardish-e-lail-o-nahār

kyā ḳhabar aa.ī ḳhizāñ kab kab ga.ī fasl-e-bahār

imtihāñ kā bhuut hai yā hai qayāmat kā samāñ

ammī aur abbā se chhup kar ro rahī haiñ laḌkiyāñ

kahte haiñ laḌke kiyā karte the jo aTkheliyāñ

''yād thiiñ ham ko bhī rañgā-rañg bazm-ārā.iyāñ''

ab hiran kī tarah se bhūle hue haiñ chaukḌī

is qadar raTnā paḌā hai jal uThī hai khopaḌī

haal par bachchoñ ke haiñ behad pareshāñ vāldain

saath meñ aulād ke un kā uḌā jaatā hai chain

garche hai ta.alīm aur raTne meñ bo.ad-ul-mashriqain

sochte haiñ vo ki achchhā zehn hai ḳhāliq kī den

kyā ḳhabar thī is tarah jī kā ziyāñ ho jā.egā

''ya.anī ye pahle hī nazr-e-imtehāñ ho jā.egā''

raat bhar jāgeñge vo jo saal bhar sote rahe

kāTne jaate haiñ gandum garche jau bote rahe

kyā tavaqqo un se rakkheñ fail jo hote rahe

naql kar ke daaġh ko dāman se jo dhote rahe

naqsh fariyādī hai in kī shoḳhī-e-tahrīr kā

ma.arka hotā hai ab tadbīr kā taqdīr kā

jo savāl important aatā hai har ik baab meñ

ġhaur se dekhā hai us ko din-dahāḌe ḳhvāb meñ

ho gayā huuñ is liye bad-nām maiñ as.hāb meñ

out kar Daalā hai paper ālam-e-asbāb meñ

kuchh to hai āḳhir jo guess paper meñ aayā yaad thā

jis ne paper set kiyā hai vo mirā ustād thā

imtihan sar par hai laDke laDkiyan hain aur kitab

date-sheet aai to goya aa gaya yaum-ul-hisab

sirf ek kaghaz ke purze se hua ye inqalab

KHud-ba-KHud har ek shararat ka hua hai sadd-e-bab

pahle thin wo shoKHiyan jo aafat-e-jaan ho gain

lekin ab naqsh-o-nigar-e-taq-e-nisyan ho gain

waqt raTne ke liye kam rah gaya zyaada hai kaam

sal bhar jin ko na dekha wo KHulase nek-nam

samne rakkhe hain un ko jhuk ke karte hain salam

un ki puja hi mein sara waqt hota hai tamam

telewision bhi nahin ghaeb hue hain sare khel

Dal kar kolhu mein bachchon ko nikalo un ka tel

aaj-kal bhule hue hain sab election aur debate

practical ki copiyon ke aaj-kal bharte hain peT

haziri ab kaun bole kaun ab aaega leT

college aur school hain sunsan KHali in ke gate

band hai kamre ke andar gardish-e-lail-o-nahaar

kya KHabar aai KHizan kab kab gai fasl-e-bahaar

imtihan ka bhut hai ya hai qayamat ka saman

ammi aur abba se chhup kar ro rahi hain laDkiyan

kahte hain laDke kiya karte the jo aTkheliyan

yaad thin hum ko bhi ranga-rang bazm-araiyan

ab hiran ki tarah se bhule hue hain chaukDi

is qadar raTna paDa hai jal uThi hai khopaDi

haal par bachchon ke hain behad pareshan waldain

sath mein aulad ke un ka uDa jata hai chain

garche hai talim aur raTne mein boad-ul-mashriqain

sochte hain wo ki achchha zehn hai KHaliq ki den

kya KHabar thi is tarah ji ka ziyan ho jaega

yani ye pahle hi nazr-e-imtehan ho jaega

raat bhar jagenge wo jo sal bhar sote rahe

kaTne jate hain gandum garche jau bote rahe

kya tawaqqo un se rakkhen fail jo hote rahe

naql kar ke dagh ko daman se jo dhote rahe

naqsh fariyaadi hai in ki shoKHi-e-tahrir ka

marka hota hai ab tadbir ka taqdir ka

jo sawal important aata hai har ek bab mein

ghaur se dekha hai us ko din-dahaDe KHwab mein

ho gaya hun is liye bad-nam main ashab mein

out kar Dala hai paper aalam-e-asbab mein

kuchh to hai aaKHir jo guess paper mein aaya yaad tha

jis ne paper set kiya hai wo mera ustad tha