pandrah-august

ai laila-e-jamhūriyat

ai dilbar-e-hindostāñ

tujh se faroġh-e-sham.a-e-shab

mahfil meñ lau kī ibtidā

ahl-e-vafā ke des meñ

tārīḳh-e-nau kī ibtidā

zulmat-bad-āmāñ ḳhaak par

sūraj kī zau kī ibtidā

har lab pe terī dāstāñ

zulfeñ tirī ambar-fashāñ

ai dilbar-e-hindostāñ

tū apne dast-e-nāz meñ

ik ḳhushnumā parcham liye

apne jilau meñ nau-ba-nau

ḳhushiyoñ kā ik aalam liye

manzil ke raahī ke liye

ik rau liye ik rum liye

hañstī huī gaatī huī

āvāz sī detī huī

sañgīt kī har taan meñ

dars-e-amal detī huī

ban kar umañgoñ kā nishāñ

aa.ī hamāre darmiyāñ

ai dilbar-e-hindostāñ

ab jagmagātī raah hai

aur rahravoñ ke qāfile

ab tez haiñ sab ke qadam

ab miT rahe haiñ fāsle

ab zindagī hai vajd meñ

ab jāgte haiñ valvale

thak kar koī sotā nahīñ

ab peḌ ke saa.e tale

naġhmāt-e-āzādī kī dhun

kitnī junūñ-añgez hai

ab nashsha-e-mai hai sivā

ab saaz kī lai tez hai

ab ruuh ko hāsil yahāñ

sad ishrat-e-parvez hai

masrūr haiñ pīr-o-javāñ

ai dilbar-e-hindostāñ

terī had-e-shādāb meñ

gañg-o-jaman ābād haiñ

kohsār ke haiñ silsile

dasht-o-daman ābād haiñ

ahl-e-yaqīñ ābād haiñ

arbāb-e-fan ābād haiñ

mahtāb aur taare liye

niile gagan ābād haiñ

jannat-nishāñ kashmīr ke

rañgīñ chaman ābād haiñ

jo haiñ hamārī aabrū

haiñ jamn ke ham sab pāsbāñ

ai dilbar-e-hindostāñ

aa ham tire āñchal tale

parcham tirā ūñchā kareñ

terī hifāzat ke liye

saif o qalam yakjā kareñ

tujh ko banā.eñ kāmrāñ

ai dilbar-e-hindostāñ

mafhūm-e-āzādī hai kyā

nūr-e-sahar kī justujū

kyā hai matā-e-hurriyat

insāñ ke dil kī aarzū

sad-āfrīñ bar-daur-e-mai

āzād haiñ jām-o-subū

āzād hai paa.el kī dhun

āzād hai zulfoñ kī bū

āzād hai soz-e-jigar

āzād hai dil kā lahū

āzād hai zauq-e-safar

āzād hai jiine kī ḳhū

jaa.e na kyuuñ dil kī lagan

mahfil-ba-mahfil kū-ba-kū

sad marhabā puurī huī

vo hasrat-e-kaif-e-numū

jis ke sabab barbād thā

sadiyoñ se apnā kārvāñ

ai dilbar-e-hindostāñ

tū zulmatoñ ke sail meñ

sham-e-farozāñ ban ga.ī

shab-tāb ufuq par hind ke

nūr-e-daraḳhshāñ ban ga.ī

vādī-e-nik.hat-bez meñ

jū-e-ḳhirāmāñ ban ga.ī

ḳhushbū se jis kī chaar sū

vo zulf-e-jānāñ ban ga.ī

dil kā sukūñ ārām-e-jāñ

ai dilbar-e-hindostāñ

ai laila-e-jamhuriyat

ai dilbar-e-hindostan

tujh se farogh-e-shama-e-shab

mahfil mein lau ki ibtida

ahl-e-wafa ke des mein

tariKH-e-nau ki ibtida

zulmat-bad-aman KHak par

suraj ki zau ki ibtida

har lab pe teri dastan

zulfen teri ambar-fashan

ai dilbar-e-hindostan

tu apne dast-e-naz mein

ek KHushnuma parcham liye

apne jilau mein nau-ba-nau

KHushiyon ka ek aalam liye

manzil ke rahi ke liye

ek rau liye ek rum liye

hansti hui gati hui

aawaz si deti hui

sangit ki har tan mein

dars-e-amal deti hui

ban kar umangon ka nishan

aai hamare darmiyan

ai dilbar-e-hindostan

ab jagmagati rah hai

aur rahrawon ke qafile

ab tez hain sab ke qadam

ab miT rahe hain fasle

ab zindagi hai wajd mein

ab jagte hain walwale

thak kar koi sota nahin

ab peD ke sae tale

naghmat-e-azadi ki dhun

kitni junun-angez hai

ab nashsha-e-mai hai siwa

ab saz ki lai tez hai

ab ruh ko hasil yahan

sad ishrat-e-parwez hai

masrur hain pir-o-jawan

ai dilbar-e-hindostan

teri had-e-shadab mein

gang-o-jaman aabaad hain

kohsar ke hain silsile

dasht-o-daman aabaad hain

ahl-e-yaqin aabaad hain

arbab-e-fan aabaad hain

mahtab aur tare liye

nile gagan aabaad hain

jannat-nishan kashmir ke

rangin chaman aabaad hain

jo hain hamari aabru

hain jamn ke hum sab pasban

ai dilbar-e-hindostan

aa hum tere aanchal tale

parcham tera uncha karen

teri hifazat ke liye

saif o qalam yakja karen

tujh ko banaen kaamran

ai dilbar-e-hindostan

mafhum-e-azadi hai kya

nur-e-sahar ki justuju

kya hai mata-e-hurriyat

insan ke dil ki aarzu

sad-afrin bar-daur-e-mai

aazad hain jam-o-subu

aazad hai pael ki dhun

aazad hai zulfon ki bu

aazad hai soz-e-jigar

aazad hai dil ka lahu

aazad hai zauq-e-safar

aazad hai jine ki KHu

jae na kyun dil ki lagan

mahfil-ba-mahfil ku-ba-ku

sad marhaba puri hui

wo hasrat-e-kaif-e-numu

jis ke sabab barbaad tha

sadiyon se apna karwan

ai dilbar-e-hindostan

tu zulmaton ke sail mein

sham-e-farozan ban gai

shab-tab ufuq par hind ke

nur-e-daraKHshan ban gai

wadi-e-nikhat-bez mein

ju-e-KHiraman ban gai

KHushbu se jis ki chaar su

wo zulf-e-jaanan ban gai

dil ka sukun aaram-e-jaan

ai dilbar-e-hindostan