payam-e-azadi

maqām-e-haq hai bilā-shak maqām-e-āzādī

buland arsh se bhī kuchh hai bām-e-āzādī

na ho sakegā kabhī mohtaram jahāñ meñ tū

jo tere dil meñ nahīñ ehtirām-e-āzādī

sunā rahā hai tujhe inqilāb-e-dahr jo kuchh

sun aur ġhaur se sun vo payām-e-āzādī

kahāñ talak ye tabāhī kī zindagī ġhāfil

uTh aur jald banā ik nizām-e-āzādī

uTh aur haath meñ le teġh-e-be-niyām-e-amal

ki hai vasīla-e-fauz-o-marām-e-āzādī

ye zindagī hai tirī maut se sivā bad-tar

ḳhudā ke vāste kar ehtimām-e-āzādī

ġhalat hai ye jo ġhulāmāna zehniyat ke saath

pakā rahā hai tū saudā-e-ḳhām-e-āzādī

pukār yuuñ tirī hargiz sunī na jā.egī

zabān-e-teġh se kar bas kalām-e-āzādī

vatan se la.anat-e-sarmāya ko fanā kar de

jo chāhtā hai baqā-e-davām-e-āzādī

haTā de parda-e-tārīk jabr-o-istibdād

ki nūr-bār ho māh-e-tamām-e-āzādī

maqam-e-haq hai bila-shak maqam-e-azadi

buland arsh se bhi kuchh hai baam-e-azadi

na ho sakega kabhi mohtaram jahan mein tu

jo tere dil mein nahin ehtiram-e-azadi

suna raha hai tujhe inqilab-e-dahr jo kuchh

sun aur ghaur se sun wo payam-e-azadi

kahan talak ye tabahi ki zindagi ghafil

uTh aur jald bana ek nizam-e-azadi

uTh aur hath mein le tegh-e-be-niyam-e-amal

ki hai wasila-e-fauz-o-maram-e-azadi

ye zindagi hai teri maut se siwa bad-tar

KHuda ke waste kar ehtimam-e-azadi

ghalat hai ye jo ghulamana zehniyat ke sath

paka raha hai tu sauda-e-KHam-e-azadi

pukar yun teri hargiz suni na jaegi

zaban-e-tegh se kar bas kalam-e-azadi

watan se lanat-e-sarmaya ko fana kar de

jo chahta hai baqa-e-dawam-e-azadi

haTa de parda-e-tarik jabr-o-istibdad

ki nur-bar ho mah-e-tamam-e-azadi