shahid-e-azadi

ek insān bhī tārīḳh badal saktā hai

jab bhagat-singh yaad aatā hai

dil ye phūlā nahīñ samātā hai

faḳhr kartā hai apnā sar ūñchā

ḳhuun rag rag meñ dauḌ jaatā hai

ham ne dekhā hai apnī āñkhoñ se

ahd-e-māzī yahī batātā hai

jo vatan par nisār hotā hai

rūh-o-dil meñ maqām paatā hai

us ko tārīḳh yaad kartī hai

misl-e-ḳhurshīd jagmagātā hai

ran meñ āzādī-e-vatan ke liye

ik mujāhid jo kaam aatā hai

aap qurbān ho ke maidāñ meñ

qaum ke hausle baḌhātā hai

jabr aatā hai barq kī zad par

zulm kā taḳht Dagmagātā hai

aur jab tak mile na āzādī

parcham-e-azm lahlahātā hai

jaarī rahtī hai jang-e-āzādī

ek ke baad ek aatā hai

ek insan bhi tariKH badal sakta hai

jab bhagat-singh yaad aata hai

dil ye phula nahin samata hai

faKHr karta hai apna sar uncha

KHun rag rag mein dauD jata hai

hum ne dekha hai apni aankhon se

ahd-e-mazi yahi batata hai

jo watan par nisar hota hai

ruh-o-dil mein maqam pata hai

us ko tariKH yaad karti hai

misl-e-KHurshid jagmagata hai

ran mein aazadi-e-watan ke liye

ek mujahid jo kaam aata hai

aap qurban ho ke maidan mein

qaum ke hausle baDhata hai

jabr aata hai barq ki zad par

zulm ka taKHt Dagmagata hai

aur jab tak mile na aazadi

parcham-e-azm lahlahata hai

jari rahti hai jang-e-azadi

ek ke baad ek aata hai