indimal

shaam kī sīḌhiyāñ kitnī kirnoñ kā maqtal banīñ

bād-e-masmūm ne toḌ kar kitne patte supurd-e-ḳhizāñ kar diye

bah ke mashkīza-e-abr se kitnī būñdeñ zamīñ kī ġhizā ban ga.iiñ

ġhair-mumkin thā un kā shumār

thak ga.iiñ ginñe vaale har ik haath kī uñgliyāñ

an-ginat kah ke aage baḌhā vaqt kā kārvāñ

an-ginat the mire zaḳhm-e-dil

TuuTī kirnoñ, bikharte hue zard pattoñ, barastī huī būñdiyoñ kī tarah

aur marham bhī nāpaid thā

lekin us roz dekhā jo ik tifl-e-nau-zā.ida kā ḳhanda-e-zer-e-lab

zaḳhm-e-dil mundamil ho ga.e sab ke sab!

sham ki siDhiyan kitni kirnon ka maqtal banin

baad-e-masmum ne toD kar kitne patte supurd-e-KHizan kar diye

bah ke mashkiza-e-abr se kitni bunden zamin ki ghiza ban gain

ghair-mumkin tha un ka shumar

thak gain ginne wale har ek hath ki ungliyan

an-ginat kah ke aage baDha waqt ka karwan

an-ginat the mere zaKHm-e-dil

TuTi kirnon, bikharte hue zard patton, barasti hui bundiyon ki tarah

aur marham bhi napaid tha

lekin us roz dekha jo ek tifl-e-nau-zaida ka KHanda-e-zer-e-lab

zaKHm-e-dil mundamil ho gae sab ke sab!