infiradiyat

aa rahā hai ik sitāra āsmāñ se TuuT kar

dauḌtā apne junūñ kī raah par dīvāna-vār

apne dil ke sho.ala-e-sozāñ meñ ḳhud jaltā huā

muntashir kartā huā dāmān-e-zulmat meñ sharār

apnī tanhā.ī pe ḳhud hī naaz farmātā huā

shauq par kartā huā ā.īn-e-fitrat ko nisār

kis qadar bebāk kitnā tez kitnā garm-rau

jis se sayyāroñ kī āsūda-ḳhirāmī sharmsār

mauja-e-dariyā ishāroñ se bulātī hai qarīb

apnī sañgīn god phailā.e hue hai kohsār

hai havā bechain āñchal meñ chhupāne ke liye

baḌh rahā hai kurra-e-gītī kā shauq-e-intizār

lekin aisā anjum-e-raushan-jabīn o tābnāk

ḳhud hī ho jaatā hai apnī tābnākī kā shikār

aa raha hai ek sitara aasman se TuT kar

dauDta apne junun ki rah par diwana-war

apne dil ke shoala-e-sozan mein KHud jalta hua

muntashir karta hua daman-e-zulmat mein sharar

apni tanhai pe KHud hi naz farmata hua

shauq par karta hua aain-e-fitrat ko nisar

kis qadar bebak kitna tez kitna garm-rau

jis se sayyaron ki aasuda-KHirami sharmsar

mauja-e-dariya ishaaron se bulati hai qarib

apni sangin god phailae hue hai kohsar

hai hawa bechain aanchal mein chhupane ke liye

baDh raha hai kurra-e-giti ka shauq-e-intizar

lekin aisa anjum-e-raushan-jabin o tabnak

KHud hi ho jata hai apni tabnaki ka shikar