influenza se corona tak

kitnā arsa lagā nā-umīdī ke parbat se patthar haTāte hue

ek biphrī huī lahr ko raam karte hue

nā-ḳhudāoñ meñ ab pīchhe kitne bache haiñ

raushnī aur añdhere kī tafrīq meñ kitne logoñ ne āñkheñ gañvā diiñ

kitnī sadiyāñ safar meñ guzārīñ

magar aaj phir us jagah haiñ jahāñ se hameñ apnī maaoñ ne

ruḳhsat kiyā thā

apne sab se baḌe ḳhvāb ko apnī āñkhoñ ke aage ujaḌte hue

dekhne se burā kuchh nahīñ hai

terī qurbat meñ yā tujh se duurī pe jitnī guzārī

terī chūḌiyoñ kī qasam zindagī dā.eroñ ke sivā kuchh nahīñ hai

kuhniyoñ se hameñ apnā muñh Dhāñp kar khāñsne ko baḌoñ ne kahā thā

to ham un pe hañste the aur sochte the ki un ko tissue-paperoñ kī mahak se allergy hai

lekin hameñ ye patā hī nahīñ thā ki un pe vo āfāt TuuTī haiñ

jin kā hameñ ik sadī ba.ad phir sāmnā hai

vabā ke dinoñ meñ kise hosh rahtā hai

kis haath ko chhoḌnā hai kise thāmnā hai

ik riyāzī ke ustād ne apne hāthoñ meñ parkār le kar

ye duniyā nahīñ dā.era khīñchnā thā

ḳhair jo bhī huā tum bhī purkhoñ ke naqsh-e-qadam par chalo

aur apnī hifāzat karo

kuchh mahīne tumheñ apne tasme nahīñ bāñdhne

is se aage to tum pe hai tum apnī manzil pe pahuñcho yā phir rāstoñ meñ raho

is se pahle ki tum apne mahbūb ko ventilator pe dekho

gharoñ meñ raho

kitna arsa laga na-umidi ke parbat se patthar haTate hue

ek biphri hui lahr ko ram karte hue

na-KHudaon mein ab pichhe kitne bache hain

raushni aur andhere ki tafriq mein kitne logon ne aankhen ganwa din

kitni sadiyan safar mein guzarin

magar aaj phir us jagah hain jahan se hamein apni maon ne

ruKHsat kiya tha

apne sab se baDe KHwab ko apni aankhon ke aage ujaDte hue

dekhne se bura kuchh nahin hai

teri qurbat mein ya tujh se duri pe jitni guzari

teri chuDiyon ki qasam zindagi daeron ke siwa kuchh nahin hai

kuhniyon se hamein apna munh Dhanp kar khansne ko baDon ne kaha tha

to hum un pe hanste the aur sochte the ki un ko tissue-paperon ki mahak se allergy hai

lekin hamein ye pata hi nahin tha ki un pe wo aafat TuTi hain

jin ka hamein ek sadi baad phir samna hai

waba ke dinon mein kise hosh rahta hai

kis hath ko chhoDna hai kise thamna hai

ek riyazi ke ustad ne apne hathon mein parkar le kar

ye duniya nahin daera khinchna tha

KHair jo bhi hua tum bhi purkhon ke naqsh-e-qadam par chalo

aur apni hifazat karo

kuchh mahine tumhein apne tasme nahin bandhne

is se aage to tum pe hai tum apni manzil pe pahuncho ya phir raston mein raho

is se pahle ki tum apne mahbub ko wentilator pe dekho

gharon mein raho