inhiraf

maiñ ḳhvāja-sarāoñ ke shahr meñ paidā huā

maiñ apnī takmīl kā lagān kis kis ko duuñ

maañ aaTā gūñdh kar bhūkī so ga.ī

aur maiñ ne miTī gūñdh kar apne liye ek ḳhudā banā liyā

sajda merī peshānī kā zaḳhm hai

magar merā marham safar-e-suqrāt ke pyāle meñ paḌā hai

ḳhudā kā bosa merā pahnāvā thā

mujhe be-libās kar ke kaT.hā pahnā diyā gayā

merī zabān ne jalte ko.ele kī gavāhī chaḳhī

aur munsif ne merī āvāz apne tarāzū se churā lī

maiñ kyā karūñ dīvāroñ

dīmak kā rizq ban jā.ūñ

yā chūhoñ ko apne badan meñ bal banā lene duuñ

jo merī chhaTī his katartā chāhte haiñ

main KHwaja-saraon ke shahr mein paida hua

main apni takmil ka lagan kis kis ko dun

man aaTa gundh kar bhuki so gai

aur main ne miTi gundh kar apne liye ek KHuda bana liya

sajda meri peshani ka zaKHm hai

magar mera marham safar-e-suqraat ke pyale mein paDa hai

KHuda ka bosa mera pahnawa tha

mujhe be-libas kar ke kaTha pahna diya gaya

meri zaban ne jalte koele ki gawahi chaKHi

aur munsif ne meri aawaz apne taraazu se chura li

main kya karun diwaron

dimak ka rizq ban jaun

ya chuhon ko apne badan mein bal bana lene dun

jo meri chhaTi his katarta chahte hain