inKHila

qulir-rūho min amr-e-rabbī

un logoñ se jo ye samajhte haiñ ki har baat lafz se shurūa hotī hai

maiñ aaj un ko chhoḌne aayā huuñ

Thiik us jagah pe jahāñ se koī lafz shurūa nahīñ hotā

sirf chand āñkheñ hotī haiñ in āñkhoñ āñkhoñ ko rakhne ke kai havā havā maiñ Doltī haiñ

sirf chand āñkheñ hotī haiñ āsmān ke chhoTe se TukḌe ko utaar kar der tak gūñjtī rahī

sirf chand āñkheñ hotī haiñ jo intizār kartī haiñ ki koī un meñ utre

aur in se kahe ki chalo ham tumheñ phir se peḌoñ aur parindoñ se ābād kar deñ

chalo phir se tumheñ be-laus mohabbat kī jalvateñ aur ḳhalvateñ baḳhsh de

so ye merā qissa hai ki maiñ ne utarne kī rivāyat kā baḌā ehtirām kiyā

ḳhud ko bhuul dūsroñ kā kaam kiyā

ye abhāg un kā thā ki unhoñ ne mujhe pahchānā nahīñ

maiñ koī aur raah ho letā par dil maanā nahīñ

maiñ bahut paas se guzrā thā

dil hī dil meñ jo umr bhar lahrātī hai zabān par kabhī nahīñ aatī

is mausīqī kā lams ban ke maiñ bahut paas se guzrā thā

maiñ bahut paas se guzrā thā

aur merī aamad ke arsa meñ zamīn kī āb-o-havā

nekī-o-badī ḳhūbsūrtī-o-bad-sūrtī sab se be-niyāz thī sarāpā raaz thī

aur gyaan ek jaage hue dil kā naam thā

savāloñ se be be-niyāz javāb nā-tamām thā

ḳhudā se miltī jaltī aadmī kī mohabbat

bichhḌī huī azal kī ne.amat

har-chand ki hāsil-e-abad hai

aur be-niyāz nek-o-bad hai

phir bhī nazar meñ aadmī kī auqāt

aur duniyā jo jism-o-jāñ kī had hai

aur ke haqīr rāstoñ meñ tum mujh se shā.irī kā matlab pūchhte ho

maiñ nahīñ batā saktā maiñ kyuuñ batā.ūñ maiñ nahīñ batātā

ye qissa merī dehātī āñkhoñ mere dehātī dil kā hai

jab bahut bahut ghanī raat meñ musāfir ke paañv tale rāsta nahīñ hotā

tab vo kis anokhe sitāre se rāsta pūchhtā hai

tab kaun sā ishāra musāfir ke paañv ko tārīk kar dene kī shart batātā hai

peḌ kī phalañgī par mahokhā boltā hai

paanī kī zabān jānñe vaalī TiTihrī kī choñch se din nikaltā hai

tum nahīñ batā sakte tum ne kabhī nahīñ batāyā tum kabhī nahīñ batāoge

tumhārī ābādiyāñ akaal meñ mare hue logoñ kī bad-duā.eñ haiñ

maazī haal mustaqbil tiin andhe faqīroñ kī sadā.eñ haiñ

maiñ tum meñ shāmil-e-safar huuñ magar panāh māñgtā apnī ajal ko DhūñDhtā huuñ

aur jo apnī ajal ko DhūñDhtā hai

tumhārī duniyā us kā kuchh nahīñ bigāḌ saktī

magar maiñ aise ahd-e-bā-asar meñ huuñ

ki jis kī har sadā sadā-e-be-asar hai

aur guftugū kā peḌ be-samar hai

ḳhudā se kar chuke haiñ jo kalām vo kalīm apnī bāzgasht chhoḌ ke chale ga.e

aur ḳhāk-e-bāz-gasht aaj

uḌ rahī hai iltibās meñ

aur vo ḳhāmushī thī jo mahān aatmā kā ramz thī

aur us kī aañkh sabz thī

phir bhī soch ke jī Dartā hai

phir bhī soch ke jī Dartā hai

jaane vaale aane vāloñ ko aisī hī aas bañdhāte haiñ

haath nahīñ aatī hai amar-latā

yahāñ pahuñch kar maiñ sochtā huuñ

yahāñ pahuñch kar maiñ sochtā huuñ

mujhe aañsū kis ne diye

aur kaun sā aañsū mere virsa kā bātin hai

kis se bichhaḌ kar miTTī paanī bantī hai

nadī akelī bahtī hai

duniyā chhoḌ ke kaun samundar kī tah meñ baiTh ke likhtā hai aur apnā qalam Dubotā hai

jis pul par chal ke kahne vaalā sunñe vaale tak pahuñchtā hai

vo ek aisā sach hai jise maut zindagī se chhup kar boltī hai

insānī dil kī shakl se milte-julte ḳheme ab bhī jalte haiñ

qulir-ruho min amr-e-rabbi

un logon se jo ye samajhte hain ki har baat lafz se shurua hoti hai

main aaj un ko chhoDne aaya hun

Thik us jagah pe jahan se koi lafz shurua nahin hota

sirf chand aankhen hoti hain in aankhon aankhon ko rakhne ke kai hawa hawa main Dolti hain

sirf chand aankhen hoti hain aasman ke chhoTe se TukDe ko utar kar der tak gunjti rahi

sirf chand aankhen hoti hain jo intizar karti hain ki koi un mein utre

aur in se kahe ki chalo hum tumhein phir se peDon aur parindon se aabaad kar den

chalo phir se tumhein be-laus mohabbat ki jalwaten aur KHalwaten baKHsh de

so ye mera qissa hai ki main ne utarne ki riwayat ka baDa ehtiram kiya

KHud ko bhul dusron ka kaam kiya

ye abhag un ka tha ki unhon ne mujhe pahchana nahin

main koi aur rah ho leta par dil mana nahin

main bahut pas se guzra tha

dil hi dil mein jo umr bhar lahraati hai zaban par kabhi nahin aati

is mausiqi ka lams ban ke main bahut pas se guzra tha

main bahut pas se guzra tha

aur meri aamad ke arsa mein zamin ki aab-o-hawa

neki-o-badi KHubsurti-o-bad-surti sab se be-niyaz thi sarapa raaz thi

aur gyan ek jage hue dil ka nam tha

sawalon se be be-niyaz jawab na-tamam tha

KHuda se milti jalti aadmi ki mohabbat

bichhDi hui azal ki neamat

har-chand ki hasil-e-abad hai

aur be-niyaz nek-o-bad hai

phir bhi nazar mein aadmi ki auqat

aur duniya jo jism-o-jaan ki had hai

aur ke haqir raston mein tum mujh se shairi ka matlab puchhte ho

main nahin bata sakta main kyun bataun main nahin batata

ye qissa meri dehati aankhon mere dehati dil ka hai

jab bahut bahut ghani raat mein musafir ke panw tale rasta nahin hota

tab wo kis anokhe sitare se rasta puchhta hai

tab kaun sa ishaara musafir ke panw ko tarik kar dene ki shart batata hai

peD ki phalangi par mahokha bolta hai

pani ki zaban jaanne wali TiTihri ki chonch se din nikalta hai

tum nahin bata sakte tum ne kabhi nahin bataya tum kabhi nahin bataoge

tumhaari aabaadiyan akal mein mare hue logon ki bad-duaen hain

mazi haal mustaqbil tin andhe faqiron ki sadaen hain

main tum mein shamil-e-safar hun magar panah mangta apni ajal ko DhunDhta hun

aur jo apni ajal ko DhunDhta hai

tumhaari duniya us ka kuchh nahin bigaD sakti

magar main aise ahd-e-ba-asar mein hun

ki jis ki har sada sada-e-be-asar hai

aur guftugu ka peD be-samar hai

KHuda se kar chuke hain jo kalam wo kalim apni bazgasht chhoD ke chale gae

aur KHak-e-baz-gasht aaj

uD rahi hai iltibas mein

aur wo KHamushi thi jo mahan aatma ka ramz thi

aur us ki aankh sabz thi

phir bhi soch ke ji Darta hai

phir bhi soch ke ji Darta hai

jaane wale aane walon ko aisi hi aas bandhate hain

hath nahin aati hai amar-lata

yahan pahunch kar main sochta hun

yahan pahunch kar main sochta hun

mujhe aansu kis ne diye

aur kaun sa aansu mere wirsa ka baatin hai

kis se bichhaD kar miTTi pani banti hai

nadi akeli bahti hai

duniya chhoD ke kaun samundar ki tah mein baiTh ke likhta hai aur apna qalam Dubota hai

jis pul par chal ke kahne wala sunne wale tak pahunchta hai

wo ek aisa sach hai jise maut zindagi se chhup kar bolti hai

insani dil ki shakl se milte-julte KHeme ab bhi jalte hain