inna lillahi o inna ileihi rajeun

ek murda thā jise maiñ ḳhud akelā

apne kandhoñ par uThā.e

aaj āḳhir dafn kar ke aa gayā huuñ

bojh bhārī thā magar apnī rihā.ī ke liye

behad zarūrī thā ki apne-āp hī us ko uThā.ūñ

aur ghar se duur jā kar dafn kar duuñ

ye haqīqat thī ki koī vāhima thā

par ye badbū-dār lāsha

sirf mujh ko hī nazar aatā thaa, jaise

ek nādīda chhalāvā ho mire pīchhe lagā ho

mere kumbe ke sabhī afrād us kī

har jagah maujūdgī se be-ḳhabar the

sirf maiñ hī thā jise ye

TikTikī bāñdhe hue be-nūr āñkhoñ se hamesha ghūrtā thā

aaj jab maiñ

apne maazī kā ye murda dafn kar ke aa gayā huuñ

kyuuñ ye lagtā hai ki merā

haal bhī jaise taḌaptā lamha lamha mar rahā ho

aur mustaqbil meñ jab ye haal bhī maazī banegā

mujh ko phir ik baar is murde ko kandhoñ par uThā.e

dafn karne ke liye jaanā paḌegā

ek murda tha jise main KHud akela

apne kandhon par uThae

aaj aaKHir dafn kar ke aa gaya hun

bojh bhaari tha magar apni rihai ke liye

behad zaruri tha ki apne-ap hi us ko uThaun

aur ghar se dur ja kar dafn kar dun

ye haqiqat thi ki koi wahima tha

par ye badbu-dar lasha

sirf mujh ko hi nazar aata tha, jaise

ek nadida chhalawa ho mere pichhe laga ho

mere kumbe ke sabhi afrad us ki

har jagah maujudgi se be-KHabar the

sirf main hi tha jise ye

TikTiki bandhe hue be-nur aankhon se hamesha ghurta tha

aaj jab main

apne mazi ka ye murda dafn kar ke aa gaya hun

kyun ye lagta hai ki mera

haal bhi jaise taDapta lamha lamha mar raha ho

aur mustaqbil mein jab ye haal bhi mazi banega

mujh ko phir ek bar is murde ko kandhon par uThae

dafn karne ke liye jaana paDega