inni-kunto-minazalemin

kahā kis ne sitam ke din kabhī daa.im nahīñ rahte

ḳhudā ko mānñe vaalā vo shā.ir jo mire andar nihāñ hai pūchhtā hai

kahā kis ne ki istibdād ik zimnī haqīqat hai

kahā kis ne tashaddud barbariyat kam baqā kuchh sānehe se haiñ

hamesha jo nahīñ rahte

faqat nairañg haiñ kuchh din raheñge

aur phir dād-o-sitad insāf kī farmā-ravā.ī lauT aa.egī

magar maiñ dekhtā huuñ har taraf bas ek manzar hai

vasī-ul-qalb insāñ jo mire andar nihāñ hai phir ye kahtā hai

avāmunnās sar ko nivḌhā.e muñh chhupā.e

ājiz-o-miskīn baiThe haiñ

sabhī ḳhavās apnī be-muravvat ḳhud-numā.ī meñ

anāniyat se aise dandanāte phir rahe haiñ

jaise mālik hoñ jahāñ ke

huā kyā hai

mire maulā ki ham jo ājiz-o-miskīn haiñ

apnī jabīñ-sā.ī meñ yuuñ masrūf haiñ

itnā bhī dil gurda nahīñ rakhte

ki in fir.aun-zādoñ se ye pūchheñ kaun ho tum

magar ye hausla kab hai kisī meñ

log to ranjūr baiThe haiñ

ki jab qabreñ bulā.eñgī

to sar par ḳhaak oḌheñge

kaha kis ne sitam ke din kabhi daim nahin rahte

KHuda ko manne wala wo shair jo mere andar nihan hai puchhta hai

kaha kis ne ki istibdad ek zimni haqiqat hai

kaha kis ne tashaddud barbariyat kam baqa kuchh sanehe se hain

hamesha jo nahin rahte

faqat nairang hain kuchh din rahenge

aur phir dad-o-sitad insaf ki farma-rawai lauT aaegi

magar main dekhta hun har taraf bas ek manzar hai

wasi-ul-qalb insan jo mere andar nihan hai phir ye kahta hai

awamunnas sar ko niwDhae munh chhupae

aajiz-o-miskin baiThe hain

sabhi KHawas apni be-murawwat KHud-numai mein

ananiyat se aise dandanate phir rahe hain

jaise malik hon jahan ke

hua kya hai

mere maula ki hum jo aajiz-o-miskin hain

apni jabin-sai mein yun masruf hain

itna bhi dil gurda nahin rakhte

ki in firaun-zadon se ye puchhen kaun ho tum

magar ye hausla kab hai kisi mein

log to ranjur baiThe hain

ki jab qabren bulaengi

to sar par KHak oDhenge