inqalab

ai jān-e-naġhma jahāñ sogvār kab se hai

tire liye ye zamīñ be-qarār kab se hai

hujūm-e-shauq sar-e-rahguzār kab se hai

guzar bhī jā ki tirā intizār kab se hai

na tābnākī-e-ruḳh hai na kākuloñ kā hujūm

hai zarra zarra pareshāñ kalī kalī maġhmūm

hai kul jahāñ muta.affin havā.eñ sab masmūm

guzar bhī jā ki tirā intizār kab se hai

ruḳh-e-hayāt pe kākul kī barhamī hī nahīñ

nigār-e-dahr meñ andāz-e-maryamī hī nahīñ

masīh o ḳhizr kī kahne ko kuchh kamī hī nahīñ

guzar bhī jā ki tirā intizār kab se hai

hayāt-baḳhsh tarāne asiir haiñ kab se

gulū-e-zehra meñ paivast tiir haiñ kab se hai

qafas meñ band tire ham-safīr haiñ kab se

guzar bhī jā ki tirā intizār kab se hai

haram ke dosh pe uqbā kā daam hai ab tak

saroñ meñ diin kā saudā-e-ḳhām hai ab tak

tavahhumāt kā aadam ġhulām hai ab tak

guzar bhī jā ki tirā intizār kab se hai

abhī dimāġh pe qahbā-e-sīm-o-zar hai savār

abhī rukī hī nahīñ tesha-zan ke ḳhuun kī dhaar

shamīm-e-adl se mahkeñ ye kūcha o bāzār

guzar bhī jā ki tirā intizār kab se hai

ai jaan-e-naghma jahan sogwar kab se hai

tere liye ye zamin be-qarar kab se hai

hujum-e-shauq sar-e-rahguzar kab se hai

guzar bhi ja ki tera intizar kab se hai

na tabnaki-e-ruKH hai na kakulon ka hujum

hai zarra zarra pareshan kali kali maghmum

hai kul jahan mutaffin hawaen sab masmum

guzar bhi ja ki tera intizar kab se hai

ruKH-e-hayat pe kakul ki barhami hi nahin

nigar-e-dahr mein andaz-e-maryami hi nahin

masih o KHizr ki kahne ko kuchh kami hi nahin

guzar bhi ja ki tera intizar kab se hai

hayat-baKHsh tarane asir hain kab se

gulu-e-zehra mein paiwast tir hain kab se hai

qafas mein band tere ham-safir hain kab se

guzar bhi ja ki tera intizar kab se hai

haram ke dosh pe uqba ka dam hai ab tak

saron mein din ka sauda-e-KHam hai ab tak

tawahhumat ka aadam ghulam hai ab tak

guzar bhi ja ki tera intizar kab se hai

abhi dimagh pe qahba-e-sim-o-zar hai sawar

abhi ruki hi nahin tesha-zan ke KHun ki dhaar

shamim-e-adl se mahken ye kucha o bazar

guzar bhi ja ki tera intizar kab se hai