inqalab-e-fitrat

badal de bāda-e-kohna badal de sāġhar-e-gil ko

badal de tarz-e-mai-noshī badal de rang-e-mahfil ko

badal de qissa-e-majnūn-e-pāband-e-salāsil ko

badal de dāstān-e-kohna-e-lailā-e-mahmil ko

badal de gulshan-e-hastī ke ḳhūnīñ lāla-zāroñ ko

badal de mahfil-e-ishrat ke kohna bāda-ḳhvāroñ ko

badal de kahkashāñ ko chāñd ko sūraj ko tāroñ ko

badal de in sabhī furqat ke jhūTe ġham-gusāroñ ko

badal de ik na.e andāz meñ raftār-e-fitrat ko

badal de ik na.ī tanzīm meñ paikār-e-fitrat ko

badal de kaif-āgīñ lutf meñ āzār-e-fitrat ko

badal de barbat-e-hastī ke har ik tār-e-fitrat ko

ye rāz-e-kāmrānī hai isī meñ kāmyābī hai

yahāñ har dam taġhayyur hai ye fitrat inqilābī hai

badal de baada-e-kohna badal de saghar-e-gil ko

badal de tarz-e-mai-noshi badal de rang-e-mahfil ko

badal de qissa-e-majnun-e-paband-e-salasil ko

badal de dastan-e-kohna-e-laila-e-mahmil ko

badal de gulshan-e-hasti ke KHunin lala-zaron ko

badal de mahfil-e-ishrat ke kohna baada-KHwaron ko

badal de kahkashan ko chand ko suraj ko taron ko

badal de in sabhi furqat ke jhuTe gham-gusaron ko

badal de ek nae andaz mein raftar-e-fitrat ko

badal de ek nai tanzim mein paikar-e-fitrat ko

badal de kaif-agin lutf mein aazar-e-fitrat ko

badal de barbat-e-hasti ke har ek tar-e-fitrat ko

ye raaz-e-kaamrani hai isi mein kaamyabi hai

yahan har dam taghayyur hai ye fitrat inqilabi hai