magar zulm ke KHilaf

ham amn chāhte haiñ magar zulm ke ḳhilāf

gar jañg lāzmī hai to phir jañg hī sahī

zālim ko jo na roke vo shāmil hai zulm meñ

qātil ko jo na Toke vo qātil ke saath hai

ham sar-ba-kaf uThe haiñ ki haq fata.h-yāb ho

kah do use jo lashkar-e-bātil ke saath hai

is Dhañg par hai zor to ye Dhañg hī sahī

zālim kī koī zaat na maz.hab na koī qaum

zālim ke lab pe zikr bhī in kā gunāh hai

phaltī nahīñ hai shāḳh-e-sitam is zamīn par

tārīḳh jāntī hai zamāna gavāh hai

kuchh kor-bātinoñ kī nazar tañg hī sahī

ye zar kī jañg hai na zamīnoñ kī jañg hai

ye jañg hai baqā ke usūloñ ke vāste

jo ḳhuun ham ne nazr diyā hai zamīn ko

vo ḳhuun hai gulāb ke phūloñ ke vāste

phūTegī sub.h-e-amn lahū-rañg hī sahī

hum amn chahte hain magar zulm ke KHilaf

gar jang lazmi hai to phir jang hi sahi

zalim ko jo na roke wo shamil hai zulm mein

qatil ko jo na Toke wo qatil ke sath hai

hum sar-ba-kaf uThe hain ki haq fatah-yab ho

kah do use jo lashkar-e-baatil ke sath hai

is Dhang par hai zor to ye Dhang hi sahi

zalim ki koi zat na mazhab na koi qaum

zalim ke lab pe zikr bhi in ka gunah hai

phalti nahin hai shaKH-e-sitam is zamin par

tariKH jaanti hai zamana gawah hai

kuchh kor-baatinon ki nazar tang hi sahi

ye zar ki jang hai na zaminon ki jang hai

ye jang hai baqa ke usulon ke waste

jo KHun hum ne nazr diya hai zamin ko

wo KHun hai gulab ke phulon ke waste

phuTegi subh-e-amn lahu-rang hi sahi