intizar

chehre pe dīd-bān the hoñToñ pe kuchh sarāb

sāñsoñ meñ ehtijāj thā nabzoñ meñ inqalāb

dil jaise suunī shaam kā sūraj bujhā bujhā

aur jism jaise tiir kamāñ par chaḌhā huā

a.asāb ke tanāv se bajtā thā ang ang

har rang-e-ārzū meñ milā thā lahū kā rang

sochoñ pe bādbān tane the ġhubār ke

pancham ke sur pe taar chaḌhe the sitār ke

ik raat meñ hazār-hā manzar badal ga.e

lamhāt phail phail ke sadiyoñ meñ Dhal ga.e

hiire pe barg-e-gul kī nazākat kā vaar thā

kis shaḳhs kā na jaane mujhe intizār thā

chehre pe did-ban the honTon pe kuchh sarab

sanson mein ehtijaj tha nabzon mein inqalab

dil jaise suni sham ka suraj bujha bujha

aur jism jaise tir kaman par chaDha hua

aasab ke tanaw se bajta tha ang ang

har rang-e-arzu mein mila tha lahu ka rang

sochon pe baadban tane the ghubar ke

pancham ke sur pe tar chaDhe the sitar ke

ek raat mein hazar-ha manzar badal gae

lamhat phail phail ke sadiyon mein Dhal gae

hire pe barg-e-gul ki nazakat ka war tha

kis shaKHs ka na jaane mujhe intizar tha