intizar

raat bhar dīda-e-namnāk meñ lahrāte rahe

saañs kī tarah se aap aate rahe jaate rahe

ḳhush the ham apnī tamannāoñ kā ḳhvāb aa.egā

apnā armān bar-afganda-naqāb aa.egā

nazreñ nīchī kiye sharmā.e hue aa.egā

kākuleñ chehre pe bikhrā.e hue aa.egā

aa ga.ī thī dil-e-muztar meñ shakebā.ī sī

baj rahī thī mire ġham-ḳhāne meñ shahnā.ī sī

patiyāñ khaḌkīñ to samjhā ki lo aap aa hī ga.e

sajde masrūr ki ma.abūd ko ham pā hī ga.e

shab ke jaage hue tāroñ ko bhī niiñd aane lagī

aap ke aane kī ik aas thī ab jaane lagī

sub.h ne sej se uThte hue lī añgḌā.ī

o sabā! tū bhī jo aa.ī to akelī aa.ī

mere mahbūb mirī niiñd uḌāne vaale

mere masjūd mirī ruuh pe chhāne vaale

aa bhī jaa, taaki mire sajdoñ kā armāñ nikle

aa bhī jaa, ki tire qadmoñ pe mirī jaañ nikle

raat bhar dida-e-namnak mein lahraate rahe

sans ki tarah se aap aate rahe jate rahe

KHush the hum apni tamannaon ka KHwab aaega

apna arman bar-afganda-naqab aaega

nazren nichi kiye sharmae hue aaega

kakulen chehre pe bikhrae hue aaega

aa gai thi dil-e-muztar mein shakebai si

baj rahi thi mere gham-KHane mein shahnai si

patiyan khaDkin to samjha ki lo aap aa hi gae

sajde masrur ki mabud ko hum pa hi gae

shab ke jage hue taron ko bhi nind aane lagi

aap ke aane ki ek aas thi ab jaane lagi

subh ne sej se uThte hue li angDai

o saba! tu bhi jo aai to akeli aai

mere mahbub meri nind uDane wale

mere masjud meri ruh pe chhane wale

aa bhi ja, taki mere sajdon ka arman nikle

aa bhi ja, ki tere qadmon pe meri jaan nikle