intizar

qābil-e-dīd hai mashshātgī-e-fasl-e-bahār

zulf-e-sumbul meñ nayā husn nazar aatā hai

surḳhī-e-chehra-e-gul se hai shafaq-zār chaman

rañg shabnam kā bhī kuchh surḳh huā jaatā hai

dekh kar surḳhī-e-ruḳhsār-e-gulistāñ gulchīñ

apne dastūr meñ tarmīm kiye jaatā hai

mutanabbe bhī kiye jaatā hai har patte ko

naam bhī fasl-e-bahārāñ kā liye jaatā hai

zer-e-tartīb hai ā.in-e-chaman-ārā.ī

ye haqīqat hai ki takmīl abhī baaqī hai

patte patte pe abhī sabt nahīñ naqsh-e-bahār

ya.anī ijmāl kī tafsīl abhī baaqī hai

bāġhbānī abhī lazzat-kash-e-gul-chīnī hai

dekh kar dast-e-havas phuul laraz jaate haiñ

itne sayyād haiñ saf basta ki murġhān-e-chaman

āshiyānoñ se nikalte hue ghabrāte haiñ

gul-faroshī hai abhī fasl-e-bahārāñ kī mushīr

lāla-o-gul kā tabassum hai hirāsāñ ab tak

laḌkhaḌātī huī chaltī hai gulistāñ meñ nasīm

phuul khilte haiñ to hote haiñ pashemāñ ab tak

yahī tārīḳh-e-chaman hai yahī tārīḳh-e-bahār

pahle do chaar hī phūloñ pe nikhār aatā hai

āñkheñ maltā huā phir niiñd se uThtā hai shabāb

patte patte meñ nazar rū-e-nigār aatā hai

le ke phir god meñ ġhunchoñ ko ye kahtī hai sabā

maiñ tumhārī huuñ ki gulchīñ kī tumhīñ ġhaur karo

daur-e-takmīl-e-bahār aa.egā aa.egā zarūr

intizār aur karo aur karo aur karo

qabil-e-did hai mashshatgi-e-fasl-e-bahaar

zulf-e-sumbul mein naya husn nazar aata hai

surKHi-e-chehra-e-gul se hai shafaq-zar chaman

rang shabnam ka bhi kuchh surKH hua jata hai

dekh kar surKHi-e-ruKHsar-e-gulistan gulchin

apne dastur mein tarmim kiye jata hai

mutanabbe bhi kiye jata hai har patte ko

nam bhi fasl-e-bahaaran ka liye jata hai

zer-e-tartib hai aain-e-chaman-arai

ye haqiqat hai ki takmil abhi baqi hai

patte patte pe abhi sabt nahin naqsh-e-bahaar

yani ijmal ki tafsil abhi baqi hai

baghbani abhi lazzat-kash-e-gul-chini hai

dekh kar dast-e-hawas phul laraz jate hain

itne sayyaad hain saf basta ki murghan-e-chaman

aashiyanon se nikalte hue ghabraate hain

gul-faroshi hai abhi fasl-e-bahaaran ki mushir

lala-o-gul ka tabassum hai hirasan ab tak

laDkhaDati hui chalti hai gulistan mein nasim

phul khilte hain to hote hain pasheman ab tak

yahi tariKH-e-chaman hai yahi tariKH-e-bahaar

pahle do chaar hi phulon pe nikhaar aata hai

aankhen malta hua phir nind se uThta hai shabab

patte patte mein nazar ru-e-nigar aata hai

le ke phir god mein ghunchon ko ye kahti hai saba

main tumhaari hun ki gulchin ki tumhin ghaur karo

daur-e-takmil-e-bahaar aaega aaega zarur

intizar aur karo aur karo aur karo