intizar

vo lahn jo sadiyoñ sadiyoñ tak

insān ke dil kī dhaḌkan thā

us lahn kā jaadū TuuT gayā

firdaus ke naġhme ḳhvāb-e-alast

uqbā kī kahānī naqsh-e-kuhan

kohsār pe bādal sargardāñ

aflāk ke qaidī shams-o-qamar

tārīḳh navā-e-pārīna

maz.hab kī rivāyat farsūda

aḳhlāq kī qadreñ chaknā-chūr

tahzīb ke mandir bosīda

fitrat kā sahārā kyā chhūTā

har rishta-e-māzī chhūT gayā

sunsān guzargāhoñ par

ab maut kā Damrū bajtā hai

dhartī kā musāfir be-chāra

hairān-o-pareshāñ sehr-zada

manzil kī talab meñ āvāra

sajde ke liye patthar bhī nahīñ

aañsū ke liye dāman to kujā

jiine ke liye lāzim hai use

kuchh taaza junūñ taḳhlīq kare

taskīn-e-jigar paane ke liye

rishtoñ kī na.ī ta.amīr kare

jis peḌ kā phal khāyā thā kabhī

us phal ke daam chukānā hai

go haath meñ hai ab lauh-o-qalam

tahrīr kā fan apnānā hai

abvāb-e-kitāb-e-hastī ko

tashkīl kā maqsad paanā hai

wo lahn jo sadiyon sadiyon tak

insan ke dil ki dhaDkan tha

us lahn ka jadu TuT gaya

firdaus ke naghme KHwab-e-alast

uqba ki kahani naqsh-e-kuhan

kohsar pe baadal sargardan

aflak ke qaidi shams-o-qamar

tariKH nawa-e-parina

mazhab ki riwayat farsuda

aKHlaq ki qadren chakna-chur

tahzib ke mandir bosida

fitrat ka sahaara kya chhuTa

har rishta-e-mazi chhuT gaya

sunsan guzargahon par

ab maut ka Damru bajta hai

dharti ka musafir be-chaara

hairan-o-pareshan sehr-zada

manzil ki talab mein aawara

sajde ke liye patthar bhi nahin

aansu ke liye daman to kuja

jine ke liye lazim hai use

kuchh taza junun taKHliq kare

taskin-e-jigar pane ke liye

rishton ki nai tamir kare

jis peD ka phal khaya tha kabhi

us phal ke dam chukana hai

go hath mein hai ab lauh-o-qalam

tahrir ka fan apnana hai

abwab-e-kitab-e-hasti ko

tashkil ka maqsad pana hai