iqbaal se ham-kalami

kal azān-e-sub.h se pahle fazā-e-quds meñ

maiñ ne dekhā kuchh shanāsā sūrateñ haiñ ham-nashīñ

the hakīm-e-sharq se shaiḳh-e-mujaddid ham-kalām

gosh-bar-āvāz sab dānish-varān-e-ilm-o-dīñ

bul-kalām-'āzād' se 'ġhālib' the masrūf-e-suḳhan

'mīr' o 'momin' daur-e-hāzir kī ġhazal pe nukta-chīñ

is se kuchh haT kar gulābī shāḳh-choñ kī chhāñv meñ

the valīullāh ke farzand nukta-āfrīñ

īstāda sarv ke saa.e meñ the maulā-e-rūm

jin ke farmūdāt meñ muzmar haiñ āyāt-e-mubīñ

soch meñ Duube hue the 'hālī'-e-darvesh-ḳhū

bāñdh kar baiThe halqa shiblī-e-ahd-āfrīñ

maiñ ne baḌh kar murshid-e-iqbāl se ye arz kī

aap ko ham tīra-baḳhtoñ kī ḳhabar hai yā nahīñ

dil-shikasta ho ke farmāyā mujhe ma.alūm hai

be-yad-e-baizā hai pīrān-e-haram kī āstīñ

saltanat le kar ḳhudā o mustafā ke naam par

ab ḳhudā o mustafā kī raah par koī nahīñ

hai abhī shahbāz kī ġhairat par kargas ḳhanda-zan

''hai vahī sarmāya-dārī banda-e-momin kā dīñ''

is se baḌh kar aur kyā fikr o amal kā inqalāb

''pādshāhoñ kī nahīñ allāh kī hai ye zamīñ''

kaun samjhā.e añdherī raat ko ā.īn-e-mahr

vaa.e bad-baḳhtī ki ḳhud momin hai mahrūm-e-yaqīñ

ḳhuun de kar ḳhāna-e-sayyād ko raushan karo

jaao mashriq ke ḳharāb-ābād ko raushan karo

kal azan-e-subh se pahle faza-e-quds mein

main ne dekha kuchh shanasa suraten hain ham-nashin

the hakim-e-sharq se shaiKH-e-mujaddid ham-kalam

gosh-bar-awaz sab danish-waran-e-ilm-o-din

bul-kalam-'azad' se 'ghaalib' the masruf-e-suKHan

'mir' o 'momin' daur-e-hazir ki ghazal pe nukta-chin

is se kuchh haT kar gulabi shaKH-chon ki chhanw mein

the waliullah ke farzand nukta-afrin

istada sarw ke sae mein the maula-e-rum

jin ke farmudat mein muzmar hain aayat-e-mubin

soch mein Dube hue the 'haali'-e-darwesh-KHu

bandh kar baiThe halqa shibli-e-ahd-afrin

main ne baDh kar murshid-e-iqbaal se ye arz ki

aap ko hum tira-baKHton ki KHabar hai ya nahin

dil-shikasta ho ke farmaya mujhe malum hai

be-yad-e-baiza hai piran-e-haram ki aastin

saltanat le kar KHuda o mustafa ke nam par

ab KHuda o mustafa ki rah par koi nahin

hai abhi shahbaz ki ghairat par kargas KHanda-zan

hai wahi sarmaya-dari banda-e-momin ka din

is se baDh kar aur kya fikr o amal ka inqalab

padshahon ki nahin allah ki hai ye zamin

kaun samjhae andheri raat ko aain-e-mahr

wae bad-baKHti ki KHud momin hai mahrum-e-yaqin

KHun de kar KHana-e-sayyaad ko raushan karo

jao mashriq ke KHarab-abaad ko raushan karo