iqbaal

sone vāloñ ko payām-e-sub.h-e-nau detī huī

ḳhvāb kī duniyā uThī añgḌā.iyāñ letī huī

matl.a-e-mashriq pe chamkā āftāb-e-shā.irī

har kiran jis kī banī tār-e-rabāb-e-shā.irī

dil pe thā jo dāġh-e-ġhaflat us ko aaheñ dho ga.iiñ

ḳhūn-e-mashriq meñ hazāroñ bijliyāñ hal ho ga.iiñ

zabt ke zaḳhm-e-nihāñ fariyād se bharne lage

ya.anī bande bhī ḳhudā se guftugū karne lage

āriz-e-pur-nūr jhalkā gesū-e-shab-rang se

jū-e-bār-e-sāz-e-dil niklī sukūt-e-sang se

ashk-e-ḳhūnīñ meñ nazar aa.ī tabassum kī jhalak

naġhma-e-bulbul banī ḳhāmosh phūloñ kī mahak

kārvāñ baḌhne lagā tezī se manzil kī taraf

kā.enāt-e-dard ḳhud khīñchne lagī dil kī taraf

dahr ke dhāre pe tūfānī havā sahne lagī

naav mashriq kī kināre kī taraf bahne lagī

jaag uThā mashriq dil-e-iqbāl kī dhaḌkan gavāh

vaah kā mahshar liye aatī hai jis kī lab pe aah

qalb-e-shā.ir se sadāqat le ke niklī shā.irī

sach kahā hai shā.irī juzvīst az paiġhambarī

sone walon ko payam-e-subh-e-nau deti hui

KHwab ki duniya uThi angDaiyan leti hui

matla-e-mashriq pe chamka aaftab-e-shairi

har kiran jis ki bani tar-e-rabab-e-shairi

dil pe tha jo dagh-e-ghaflat us ko aahen dho gain

KHun-e-mashriq mein hazaron bijliyan hal ho gain

zabt ke zaKHm-e-nihan fariyaad se bharne lage

yani bande bhi KHuda se guftugu karne lage

aariz-e-pur-nur jhalka gesu-e-shab-rang se

ju-e-bar-e-saz-e-dil nikli sukut-e-sang se

ashk-e-KHunin mein nazar aai tabassum ki jhalak

naghma-e-bulbul bani KHamosh phulon ki mahak

karwan baDhne laga tezi se manzil ki taraf

kaenat-e-dard KHud khinchne lagi dil ki taraf

dahr ke dhaare pe tufani hawa sahne lagi

naw mashriq ki kinare ki taraf bahne lagi

jag uTha mashriq dil-e-iqbaal ki dhaDkan gawah

wah ka mahshar liye aati hai jis ki lab pe aah

qalb-e-shair se sadaqat le ke nikli shairi

sach kaha hai shairi juzwist az paighambari