عرفان

شعلہ زن ان کے لہو میں ہے جلال محمود

آج تک جو تہہ محراب رہے وقف سجود

اے کہ معلوم نہیں تجھ کو خودی کا مقصود

آتشیں عزم سے ہے معرکۂ بود و نبود

عشق و مستی ہمہ تن دبدبہ ہائے محمود

پاک ہے اسود و احمر سے شبستان وجود

زندگی جس سے لرزتی ہے خلیل اللہی

ہو خراب ظن و تخمیں تو ہے نار نمرود

مجھ سے نومیدیٔ نظارۂ انوار نہ پوچھ

اب مرا جذب دروں بھی ہے پشیمان نمود

ایک تصویر کے دو رخ ہیں جلال اور جمال

وہی گلزار خلیل اور وہی نار نمرود

تو ہے نامحرم تاب و تپ باطن ورنہ

تیری آہوں سے پگھل جائے ستاروں کا وجود

سینۂ لالہ ہو یا آئینہ زار شبنم

ڈھونڈ لیتی ہے نظر جلوہ گہ لا موجود

ایک ہنگامۂ عرفان و تجسس کے بغیر

زیست بیکار یقیں خام نمازیں بے سود