irtiqa

qadam qadam par janāze rakkhe hue haiñ in ko uThāo jaao

ye dekhte kyā ho kaam merā nahīñ tumhārā ye kaam hai aaj aur kal kā

tum aaj meñ mahv ho ke shāyad ye sochte ho

na biitā kal aur na aane vaalā tumhārā kal hai

magar yūñhī soch meñ jo Duube to kuchh na hogā

janāze rakkhe hue haiñ in ko uThāo jaao

chalo janāzoñ ko ab uThāo

ye bahte aañsū baheñge kab tak uTho aur ab in ko poñchh Daalo

ye rāstā kab hai ik lahad hai

lahad ke andar to ik janāza hī baar pā.egā ye bhī socho

to kyā mashiyyat ke faisle se haTe haTe reñgte rahoge

janāze rakkhe hue haiñ in ko uThāo jaao

lahad khulī hai

lahad hai aise ki jaise bhūke kā lālchī kā muñh khulā huā ho

magar koī taaza aur taaza na ho mayassar to baasī luqma bhī us ke

andar na jaane paa.e

khulā dahan yuuñ khulā rahe jaise ik ḳhalā ho

uThāo jaldī uThāo āñkhoñ ke sāmne kuchh janāze rakkhe

hue haiñ in ko uThāo jaao

lahad meñ in ko abad kī ik gahrī niind meñ ġharq kar ke aao

agar ye murde lahad ke andar ga.e to shāyad

tumhārī murda hayāt bhī aaj jaag uTThe

qadam qadam par janaze rakkhe hue hain in ko uThao jao

ye dekhte kya ho kaam mera nahin tumhaara ye kaam hai aaj aur kal ka

tum aaj mein mahw ho ke shayad ye sochte ho

na bita kal aur na aane wala tumhaara kal hai

magar yunhi soch mein jo Dube to kuchh na hoga

janaze rakkhe hue hain in ko uThao jao

chalo janazon ko ab uThao

ye bahte aansu bahenge kab tak uTho aur ab in ko ponchh Dalo

ye rasta kab hai ek lahad hai

lahad ke andar to ek janaza hi bar paega ye bhi socho

to kya mashiyyat ke faisle se haTe haTe rengte rahoge

janaze rakkhe hue hain in ko uThao jao

lahad khuli hai

lahad hai aise ki jaise bhuke ka lalchi ka munh khula hua ho

magar koi taza aur taza na ho mayassar to basi luqma bhi us ke

andar na jaane pae

khula dahan yun khula rahe jaise ek KHala ho

uThao jaldi uThao aankhon ke samne kuchh janaze rakkhe

hue hain in ko uThao jao

lahad mein in ko abad ki ek gahri nind mein gharq kar ke aao

agar ye murde lahad ke andar gae to shayad

tumhaari murda hayat bhi aaj jag uTThe