is mein meri to koi ghalati nahin

is meñ merī to koī ġhalatī nahīñ

maiñ jab paidā huī to

kisī ne mujh ko zinda dafnāyā nahīñ

jab mere par-o-bāl nikalnā shurūa hue

tab kisī ne mere paroñ ko nahīñ kaaTā

jab maiñ ne bolnā sīkhā

tab kisī ne merī zabān nahīñ kaaTī

jab maiñ ne apne pairoñ par chalnā sīkhā

tab kisī ne mere paañv nahīñ kaaTe

maiñ ne jab dekhnā shurūa kiyā

kisī ne merī āñkheñ nahīñ nocheñ

maiñ sochtī thī jab

kisī ne mujhe pāgal nahīñ kahā

maiñ likhtī thī jab

kisī ne mujh se qalam kyuuñ nahīñ chhīnā

mere janm se ab tak jo hotā rahā

vo kisī ne nahīñ badlā

ab meñ jaisī huuñ

use kaise badal luuñ

maiñ jaisī bhī huuñ

us meñ merī to koī ġhalatī nahīñ

is mein meri to koi ghalati nahin

main jab paida hui to

kisi ne mujh ko zinda dafnaya nahin

jab mere par-o-baal nikalna shurua hue

tab kisi ne mere paron ko nahin kaTa

jab main ne bolna sikha

tab kisi ne meri zaban nahin kaTi

jab main ne apne pairon par chalna sikha

tab kisi ne mere panw nahin kaTe

main ne jab dekhna shurua kiya

kisi ne meri aankhen nahin nochen

main sochti thi jab

kisi ne mujhe pagal nahin kaha

main likhti thi jab

kisi ne mujh se qalam kyun nahin chhina

mere janm se ab tak jo hota raha

wo kisi ne nahin badla

ab mein jaisi hun

use kaise badal lun

main jaisi bhi hun

us mein meri to koi ghalati nahin