is se ziyaada kuchh nahin

maiñ nahīñ jāntā ki yahāñ se kisī ne mujh se kuchh kahā

yā vahāñ se kisī ne tum se kuchh kahā

yā kisī ne kuchh bhī nahīñ kahā

to binā kuchh kahe hue hī kuchh sun liyā hogā

niiñd meñ chalte hue aadmī ke liye

hamvār raah bhī khaa.ī ban jaatī hai

aur kahīñ bhī girne ke liye

girne vaale ko bhī kuchh batāyā nahīñ jaatā

aur agar girāne vaalā ḳhudā ke dil meñ baiThā ho

to girne vaale ko

mahz ye batāne ke liye ki chalo uTho

tumheñ girāyā jaane vaalā hai

to kyā vo use dekh saktā hai

so kyuuñ na baat vahīñ se shurūa kī jaa.e

jahāñ se aadmī kī zaat ne hī

aadmī kī zaat se kahā

ki agar saat samundaroñ se bhī baḌh kar

tumhāre aañsū aur tumhāre ġham hoñge

to chalo mil ke baañT leñge

aur tumheñ itnā hañsā.eñ

ki jīvan bhar kabhī rone ke liye

ek aañsū bhī nahīñ milegā

magar vo ye nahīñ jāntī hogī

ki kabhī niiñd ko niiñd aa jaatī hai

bilkul vaise hī

jaise maut ko bhī maut aatī hai

koī soyā huā peḌ bhī

kisī so.e hue peḌ meñ so jaatā hai

aur yahī vo samay hotā hai

jab zindagī ke tamām kaam

bahut ḳhuub karte hue

aadmī kī nazar ke sāmne bhī

tārīk dīvār aa jaatī hai

so yahāñ tak pahuñch ke ma.alūm huā

ki kuchh bhī to nahīñ thā

ki agar kuchh hotā bhī

to us ke hone se pahle

bahut kuchh ho chukā hotā

koī kisī ke liye kabhī nahīñ jaagā

koī kisī ke liye kabhī nahīñ royā

koī kisī ke liye kabhī nahīñ jalā

koī kisī ke liye kabhī nahīñ bujhā

kisī bahut baḌe jhuuT se mile hue

kisī bahut baḌe sach meñ

na koī jhuuT miltā hai na koī sach

main nahin jaanta ki yahan se kisi ne mujh se kuchh kaha

ya wahan se kisi ne tum se kuchh kaha

ya kisi ne kuchh bhi nahin kaha

to bina kuchh kahe hue hi kuchh sun liya hoga

nind mein chalte hue aadmi ke liye

hamwar rah bhi khai ban jati hai

aur kahin bhi girne ke liye

girne wale ko bhi kuchh bataya nahin jata

aur agar girane wala KHuda ke dil mein baiTha ho

to girne wale ko

mahz ye batane ke liye ki chalo uTho

tumhein giraya jaane wala hai

to kya wo use dekh sakta hai

so kyun na baat wahin se shurua ki jae

jahan se aadmi ki zat ne hi

aadmi ki zat se kaha

ki agar sat samundaron se bhi baDh kar

tumhaare aansu aur tumhaare gham honge

to chalo mil ke banT lenge

aur tumhein itna hansaen

ki jiwan bhar kabhi rone ke liye

ek aansu bhi nahin milega

magar wo ye nahin jaanti hogi

ki kabhi nind ko nind aa jati hai

bilkul waise hi

jaise maut ko bhi maut aati hai

koi soya hua peD bhi

kisi soe hue peD mein so jata hai

aur yahi wo samay hota hai

jab zindagi ke tamam kaam

bahut KHub karte hue

aadmi ki nazar ke samne bhi

tarik diwar aa jati hai

so yahan tak pahunch ke malum hua

ki kuchh bhi to nahin tha

ki agar kuchh hota bhi

to us ke hone se pahle

bahut kuchh ho chuka hota

koi kisi ke liye kabhi nahin jaga

koi kisi ke liye kabhi nahin roya

koi kisi ke liye kabhi nahin jala

koi kisi ke liye kabhi nahin bujha

kisi bahut baDe jhuT se mile hue

kisi bahut baDe sach mein

na koi jhuT milta hai na koi sach