ishq ki taqwim mein

'mushīr'-uncle! ye sab bāteñ adhūrī haiñ

jo maiñ ne aap se kī thiiñ

jo mujh se aap ne kī haiñ

magar chaliye

abhī to jin kī botal

aur aadhī shaam baaqī hai

ye bāteñ phir se karte haiñ

'mushīr'-uncle! zamāna ishq se baḌh kar nahī hai

jo kahe jo kuchh kare

jo bhī dikhā.e

ishq se baḌh kar nahī hai

ishq to ḳhud ik zamāna hai

ye puurā ahd hai

ik daur hai

is daur meñ kyā kyā nahī hotā

kabhī ye daur daur-e-ibtilā hai

aur kabhī ik sarḳhushī

vāraftagī kā ahd-e-paiham hai

'mushīr'-uncle! kabhī mahbūb kā jab naam aa jaa.e

to merī saañs kī Dorī meñ

girheñ paḌne lagtī haiñ

ye maiñ aur aap donoñ jānte haiñ

jis tarah jaadū hai bar-haq

ishq bar-haq hai

zamīnoñ āsmānoñ

is jahāñ, baaqī jahānoñ meñ

zamān-e-ishq bar-haq hai

'mushīr'-uncle hamāre paas do hī rāste haiñ

mas.ala ye hai

ki donoñ rāste ab

ek hī jānib se aate

ek hī jānib ko jaate haiñ

ki maiñ aur aap donoñ jānte haiñ

jis tarah jaadū hai bar-haq

ishq bar-haq hai!

'mushir'-uncle! ye sab baaten adhuri hain

jo main ne aap se ki thin

jo mujh se aap ne ki hain

magar chaliye

abhi to jin ki botal

aur aadhi sham baqi hai

ye baaten phir se karte hain

'mushir'-uncle! zamana ishq se baDh kar nahi hai

jo kahe jo kuchh kare

jo bhi dikhae

ishq se baDh kar nahi hai

ishq to KHud ek zamana hai

ye pura ahd hai

ek daur hai

is daur mein kya kya nahi hota

kabhi ye daur daur-e-ibtila hai

aur kabhi ek sarKHushi

waraftagi ka ahd-e-paiham hai

'mushir'-uncle! kabhi mahbub ka jab nam aa jae

to meri sans ki Dori mein

girhen paDne lagti hain

ye main aur aap donon jaante hain

jis tarah jadu hai bar-haq

ishq bar-haq hai

zaminon aasmanon

is jahan, baqi jahanon mein

zaman-e-ishq bar-haq hai

'mushir'-uncle hamare pas do hi raste hain

masala ye hai

ki donon raste ab

ek hi jaanib se aate

ek hi jaanib ko jate hain

ki main aur aap donon jaante hain

jis tarah jadu hai bar-haq

ishq bar-haq hai!