ishq mahi baghair aab

jāgte sote ye ḳhayāl aayā

tujh ko sochā to ye savāl aayā

tum kahāñ aur maiñ kahāñ jānāñ

fāsle kyuuñ haiñ darmiyāñ jānāñ

yuuñ mile ham ki mil nahīñ paa.e

phuul hasrat ke khil nahīñ paa.e

barq par nāma-bar savār huā

dhuup meñ abr sāya-dār huā

phir ta.alluq ke taar TuuT ga.e

ham pe sadme hazār TuuT ga.e

bebasī kī ajiib shaam aa.ī

zindagī misl-e-intiqām aa.ī

phir tirī diid kī sa.ādat ho

vaqt ko iid kī bashārat ho

ġhair mumkin hai is tarah honā

ġham nahānā hai daaġh hai dhonā

mas.ala aa gayā hai paanī kā

ya.anī dariyā kī be-zabānī kā

qurbat-e-jāñ ke mushk hote hī

ik samundar ke ḳhushk hote hī

dard-e-sahrā nasīb hai apnā

ek vahshat raqīb hai apnā

silsila duur tak sarāb kā hai

ishq maahī baġhair aab kā hai

jagte sote ye KHayal aaya

tujh ko socha to ye sawal aaya

tum kahan aur main kahan jaanan

fasle kyun hain darmiyan jaanan

yun mile hum ki mil nahin pae

phul hasrat ke khil nahin pae

barq par nama-bar sawar hua

dhup mein abr saya-dar hua

phir talluq ke tar TuT gae

hum pe sadme hazar TuT gae

bebasi ki ajib sham aai

zindagi misl-e-intiqam aai

phir teri did ki saadat ho

waqt ko id ki bashaarat ho

ghair mumkin hai is tarah hona

gham nahana hai dagh hai dhona

masala aa gaya hai pani ka

yani dariya ki be-zabani ka

qurbat-e-jaan ke mushk hote hi

ek samundar ke KHushk hote hi

dard-e-sahra nasib hai apna

ek wahshat raqib hai apna

silsila dur tak sarab ka hai

ishq mahi baghair aab ka hai