israfil ki maut

marg-e-isrāfīl par aañsū bahāo

vo ḳhudāoñ kā muqarrab vo ḳhudāvand-e-kalām

saut-e-insānī kī rūh-e-jāvedāñ

āsmānoñ kī nidā-e-be-karāñ

aaj sākit misl-e-harf-e-nā-tamām

marg-e-isrāfīl par aañsū bahāo

aao isrāfīl ke is ḳhvāb-e-be-hañgām par aañsū bahā.eñ

āramīda hai vo yuuñ qarnā ke paas

jaise tūfāñ ne kināre par ugal Daalā use

reg-e-sāhil par chamaktī dhuup meñ chup chaap

apne suur ke pahlū meñ vo ḳhvābīda hai

us kī dastār us ke gesū us kī riish

kaise ḳhāk-ālūda haiñ

the kabhī jin kī taheñ būd-o-nabūd

kaise is kā suur is ke lab se duur

apnī chīḳhoñ apnī fariyādoñ meñ gum

jhilmilā uThte the jis se dair-o-zūd

marg-e-isrāfīl par aañsū bahāo

vo mujassam hamhama thā vo mujassam zamzama

vo azal se tā abad phailī huī ġhaibī sadāoñ kā nishāñ

marg-e-isrāfīl se

halqa dar halqa farishte nauha gar

ibn-e-ādam zulf-dar-ḳhāk-o-nazār

hazrat-e-yazdāñ kī āñkheñ ġham se taar

āsmānoñ kī safīr aatī nahīñ

ālam-e-lāhūt se koī nafīr aatī nahīñ

marg-e-isrāfīl se

is jahāñ par band āvāzoñ kā rizq

mutriboñ kā rizq aur sāzoñ kā rizq

ab muġhannī kis tarah gā.egā aur gā.egā kyā

sunñe vāloñ ke diloñ ke taar chup

ab koī raqqās kyā thirkegā lahrā.egā kyā

bazm ke farsh-o-dar-o-dīvār chup

ab ḳhatīb-e-shahr farmā.egā kyā

masjidoñ ke āstān-o-gumbad-o-mīnār chup

fikr kā sayyād apnā daam phailā.egā kyā

tā.irān-e-manzil-o-kohsār chup

marg-e-isrāfīl hai

gosh-e-shanvā kī lab-e-goyā kī maut

chashm-e-bīnā kī dil-e-dānā kī maut

thī isī ke dam se durveshoñ kī saarī hāv-hū

ahl-e-dil kī ahl-e-dil se guftugū

ahl-e-dil jo aaj gosha-gīr-o-surma-dar-gulū

ab tanā tā-hū bhī ġhā.eb aur yā-rab hā bhī gum

ab galī kūchoñ kī har aavā bhī gum

ye hamārā āḳhirī maljā bhī gum

marg-e-isrāfīl se

is jahāñ kā vaqt jaise so gayā pathrā gayā

jaise koī saarī āvāzoñ ko yaksar khā gayā

aisī tanhā.ī ki husn-e-tām yaad aatā nahīñ

aisā sannāTā ki apnā naam yaad aatā nahīñ

marg-e-isrāfīl se

dekhte rah jā.eñge duniyā ke aamir bhī

zabāñ-bandī ke ḳhvāb

jis meñ majbūroñ kī sargoshī to ho

us ḳhudāvandī ke ḳhvāb

marg-e-israfil par aansu bahao

wo KHudaon ka muqarrab wo KHudawand-e-kalam

saut-e-insani ki ruh-e-jawedan

aasmanon ki nida-e-be-karan

aaj sakit misl-e-harf-e-na-tamam

marg-e-israfil par aansu bahao

aao israfil ke is KHwab-e-be-hangam par aansu bahaen

aaramida hai wo yun qarna ke pas

jaise tufan ne kinare par ugal Dala use

reg-e-sahil par chamakti dhup mein chup chap

apne sur ke pahlu mein wo KHwabida hai

us ki dastar us ke gesu us ki rish

kaise KHak-aluda hain

the kabhi jin ki tahen bud-o-nabud

kaise is ka sur is ke lab se dur

apni chiKHon apni fariyaadon mein gum

jhilmila uThte the jis se dair-o-zud

marg-e-israfil par aansu bahao

wo mujassam hamhama tha wo mujassam zamzama

wo azal se ta abad phaili hui ghaibi sadaon ka nishan

marg-e-israfil se

halqa dar halqa farishte nauha gar

ibn-e-adam zulf-dar-KHak-o-nazar

hazrat-e-yazdan ki aankhen gham se tar

aasmanon ki safir aati nahin

aalam-e-lahut se koi nafir aati nahin

marg-e-israfil se

is jahan par band aawazon ka rizq

mutribon ka rizq aur sazon ka rizq

ab mughanni kis tarah gaega aur gaega kya

sunne walon ke dilon ke tar chup

ab koi raqqas kya thirkega lahraega kya

bazm ke farsh-o-dar-o-diwar chup

ab KHatib-e-shahr farmaega kya

masjidon ke aastan-o-gumbad-o-minar chup

fikr ka sayyaad apna dam phailaega kya

tairan-e-manzil-o-kohsar chup

marg-e-israfil hai

gosh-e-shanwa ki lab-e-goya ki maut

chashm-e-bina ki dil-e-dana ki maut

thi isi ke dam se durweshon ki sari haw-hu

ahl-e-dil ki ahl-e-dil se guftugu

ahl-e-dil jo aaj gosha-gir-o-surma-dar-gulu

ab tana ta-hu bhi ghaeb aur ya-rab ha bhi gum

ab gali kuchon ki har aawa bhi gum

ye hamara aaKHiri malja bhi gum

marg-e-israfil se

is jahan ka waqt jaise so gaya pathra gaya

jaise koi sari aawazon ko yaksar kha gaya

aisi tanhai ki husn-e-tam yaad aata nahin

aisa sannaTa ki apna nam yaad aata nahin

marg-e-israfil se

dekhte rah jaenge duniya ke aamir bhi

zaban-bandi ke KHwab

jis mein majburon ki sargoshi to ho

us KHudawandi ke KHwab