izafi zaruraton ke liye ek nazm

har aadmī kī qismat meñ

ek na ek sazā hotī hai

mere liye har baar

tum se duur rahne kī sazā muntaḳhab kī jā.egī

nā-insāfī ke pesh-e-nazar

sazā kā kaam kisī munsif par nahīñ chhoḌā jā.egā

lekin is ke bāvajūd

vo tauhīn kā vo notice nahīñ jaarī kar sakeñge

jis meñ vahī hoñge mudda.ī

vahī hoñge munsif

hamārī shahriyat ko ḳhaam kar diyā gayā hai

achchhā huā ki hamāre diloñ ko

ābgīne tarāshne vāloñ par nahīñ chhoḌā gayā

ek āvāra-manush ne

mujhe chaak chalānā

aur miTTī meñ dil rakhnā sikhāyā

maiñ har raat apne dil ko

miTTī meñ milātā aur na.ī na.ī tarah gūñdhtā huuñ

har sub.h us mulk ke liye

ek nayā ḳhvāb Dhāltā huuñ

jis ke liye juġhrāfi.e kī tārīḳh meñ

koī jagah nahīñ hogī

abhī āsmānoñ par rahne vāloñ ko

mere jarā.em kā ilm nahīñ huā

varna vo mere sar par

ek aadh āsmān zarūr girā dete

ehtiyātan

maiñ ne

tumheñ in saarī bātoñ

aur apne ḳhvāboñ se duur rakhā hai

isī liye ab tak

kisī musavvir yā mujassama-sāz ne

tumheñ koī shakl nahīñ dī

maiñ ne tumheñ un ḳhayāloñ se bhī duur rakhā hai

jin tak koī shā.er rasā.ī hāsil kar sake

yahāñ tak ki

maiñ ne tumheñ apnī rasā.ī se bhī duur rakhā hai

taaki tumhāre vo libās ālūda na hoñ

jinheñ pahan kar

tum ā.īñe ke sāmne nahīñ jaatī hogī

jinheñ pahan kar

tum baaġh kī sair

aur bāzār jaanā bhī mauqūf kar detī hogī

maiñ ne

apne liye sazā tajvīz karne kā iḳhtiyār

kisī ko nahīñ diyā

tumheñ bhī nahīñ

varna tum mere liye qurbat tajvīz kar saktī thiiñ

har aadmi ki qismat mein

ek na ek saza hoti hai

mere liye har bar

tum se dur rahne ki saza muntaKHab ki jaegi

na-insafi ke pesh-e-nazar

saza ka kaam kisi munsif par nahin chhoDa jaega

lekin is ke bawajud

wo tauhin ka wo notice nahin jari kar sakenge

jis mein wahi honge muddai

wahi honge munsif

hamari shahriyat ko KHam kar diya gaya hai

achchha hua ki hamare dilon ko

aabgine tarashne walon par nahin chhoDa gaya

ek aawara-manush ne

mujhe chaak chalana

aur miTTi mein dil rakhna sikhaya

main har raat apne dil ko

miTTi mein milata aur nai nai tarah gundhta hun

har subh us mulk ke liye

ek naya KHwab Dhaalta hun

jis ke liye jughrafie ki tariKH mein

koi jagah nahin hogi

abhi aasmanon par rahne walon ko

mere jaraem ka ilm nahin hua

warna wo mere sar par

ek aadh aasman zarur gira dete

ehtiyatan

main ne

tumhein in sari baaton

aur apne KHwabon se dur rakha hai

isi liye ab tak

kisi musawwir ya mujassama-saz ne

tumhein koi shakl nahin di

main ne tumhein un KHayalon se bhi dur rakha hai

jin tak koi shaer rasai hasil kar sake

yahan tak ki

main ne tumhein apni rasai se bhi dur rakha hai

taki tumhaare wo libas aaluda na hon

jinhen pahan kar

tum aaine ke samne nahin jati hogi

jinhen pahan kar

tum bagh ki sair

aur bazar jaana bhi mauquf kar deti hogi

main ne

apne liye saza tajwiz karne ka iKHtiyar

kisi ko nahin diya

tumhein bhi nahin

warna tum mere liye qurbat tajwiz kar sakti thin